``லிவ்-இன் ரிலேஷன்ஷிப் பிரச்னைகளைத் தீர்க்க இதை உருவாக்குங்கள்" - ராஜஸ்தான் நீதிமன்றத்தின் உத்தரவு

லிவ்-இன் ரிலேஷன்ஷிப்பில் இருப்பவர்களின் பாதுகாப்புக்குப் பொருத்தமான சட்டம் இயற்றப்படும் வரை, இந்த ரிலேஷன்ஷிப்பில் எழும் பிரச்னைகளைத் தீர்க்க வலைத்தளப் பக்கத்தை உருவாக்குமாறு மாநில அரசுக்கு ராஜஸ்தான் உயர் நீதிமன்றம் உத்தரவிட்டிருக்கிறது.

முன்னதாக, லிவ்-இன் ரிலேஷன்ஷிப்பில் இருப்பவர்கள் பலர் பாதுகாப்பு கோரி தாக்கல் செய்த மனுக்கள் ராஜஸ்தான் உயர் நீதிமன்றத்தில் நீதிபதி அன்னோப் குமார் தந்த் அடங்கிய ஒற்றை நீதிபதி அமர்வில் விசாரணைக்கு வந்தது.

அப்போது, லிவ்-இன் ரிலேஷன்ஷிப்பை நெறிமுறைப்படுத்தவேண்டிய அவசியத்தை வலியுறுத்திய நீதிமன்ற அமர்வு, ``பலர் லிவ்-இன் ரிலேஷன்ஷிப்பில் இருக்கின்றனர். ஆனால், இதைக் குடும்பமும் சமூகமும் ஏற்றுக்கொள்ளாததால் அவர்களிடமிருந்து இவர்கள் அச்சுறுத்தலை எதிர்கொள்கின்றனர். அதனால், அரசியலமைப்பின் 226-வது பிரிவின் கீழ் ரிட் மனு தாக்கல் செய்து, பிரிவு 21-ன் கீழ் பாதுகாப்பு கோரி நீதிமன்றங்களை அணுகுகின்றனர். நீதிமன்றங்கள் இதுபோன்ற மனுக்களில் நிரம்பி வழிகின்றன.

லிவ்-இன் ரிலேஷன்ஷிப் ஐடியா தனித்துவமானதாகவும், கவர்ச்சிகரமானதாகவும் தோன்றலாம். ஆனால், உண்மையில் இதனால் வரும் பிரச்னைகள் சவாலானதாக இருக்கும். இத்தகைய உறவில் பெண்ணின் நிலை மனைவிக்காக நிலை அல்ல. சமூகத்திலும் அதற்கான அங்கீகாரமோ, புனிதத்தன்மையோ இல்லை. எனவே, அரசாங்கத்தால் பொருத்தமான சட்டம் இயற்றப்படும் வரை, ஒவ்வொரு மாவட்டத்திலும் லிவ்-இன் ரிலேஷன்ஷிப்பை பதிவு செய்வதைக் கண்காணிக்க தகுதி வாய்ந்த அதிகார அமைப்பு நிறுவப்பட வேண்டும். அந்த அமைப்பு, லிவ்-இன் ரிலேஷன்ஷிப் மற்றும் அவர்கள் மூலமாகப் பிறக்கும் குழந்தைகளின் குறைகளை நிவர்த்தி செய்யும்.

எனவே, லிவ்-இன் ரிலேஷன்ஷிப்பில் வரும் பிரச்னைகளைத் தீர்ப்பதற்காக ஒரு போர்ட்டல் தொடங்கப்பட வேண்டும். மார்ச் 1 அல்லது அதற்குள் நடவடிக்கை எடுப்பதற்கான அறிக்கையை நீதிமன்றத்தில் சமர்ப்பிக்க வேண்டும்." என்று உத்தரவிட்டது. அதோடு, இந்த உத்தரவின் நகலை தலைமைச் செயலாளர், சட்டம் மற்றும் நீதித்துறை முதன்மைச் செயலாளர், நீதி மற்றும் சமூக நலத்துறை செயலாளர் அனுப்ப வேண்டும் என்று குறிப்பிடப்பட்டிருக்கிறது.