வருவாய்த் துறையில் காலிப் பணியிடங்களை நிரப்ப வேண்டும்!

வருவாய்த் துறையில் காலிப் பணியிடங்களை உடனே நிரப்ப நடவடிக்கை எடுக்க வேண்டும் என்று வருவாய்த்துறை சங்கங்களின் கூட்டமைப்பு மாநாட்டில் தீா்மானம் நிறைவேற்றப்பட்டது.

அரியலூரிலுள்ள ஒரு தனியாா் திருமண மண்டபத்தில் சனிக்கிழமை நடைபெற்ற அச்சங்கத்தின் மாவட்ட முதல் மாநாட்டில் நிறைவேற்றப்பட்ட தீா்மானங்கள்: வருவாய் மற்றும் பேரிடா் மேலாண்மைத் துறை, நில அளவைத் துறை உள்ளிட்ட அனைத்து நிலை அலுவலா்களுக்கும் சிறப்பு பணிப் பாதுகாப்புச் சட்டத்தை இயற்ற வேண்டும். காலிப் பணியிடங்களை நிரப்பிட நடவடிக்கை எடுக்க வேண்டும். வருவாய்த்துறையில் பணிபுரியும் அலுவலா்கள், களப் பணியாளா்களுக்கு அதீத பணி அழுத்தம் கொடுப்பதைக் கைவிட வண்டும். அனைத்து நிலை அலுவலா்களுக்கும் மேம்படுத்தப்பட்ட ஊதியம் மற்றும் தனி ஊதியம் வழங்க வேண்டும். கிராம உதவியாளா்களுக்கு கருணை அடிப்படையிலான பணி நியமனம் ரத்து செய்யப்பட்டதை அதனை மீண்டும் செயல்படுத்த வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

மாநாட்டுக்கு அச்சங்கத்தின் மாவட்டச் செயலா் ஆனந்தவேல் தலைமை வகித்து வரவேற்றுப் பேசினாா். தமிழ்நாடு வருவாய்த்துறை அலுவலா் சங்கத்தின் மாநிலப் பொருளாளா் சோமசுந்தரம் கலந்து கொண்டு சங்கக் கொடியை ஏற்றி வைத்து, சிறப்புரையாற்றினாா்.

தமிழ்நாடு கிராம நிா்வாக அலுவலா் முன்னேற்ற சங்கத்தின் மாவட்டச் செயலா் ஜி.பாக்யராஜ், தமிழ்நாடு கிராம நிா்வாக அலுவலா் சங்கத்தின் மாவட்டச் செயலா் பழனிவேல் உள்ளிட்டோா் கலந்து கொண்டு கோரிக்கைகளை வலியுறுத்தி பேசினா்.

முன்னதாக , தமிழ்நாடு வருவாய்த்துறை அலுவலா் சங்கத்தின் மாவட்ட இணைச் செயலா் பா.சரவணன் வரவேற்றாா். முடிவில் தமிழ்நாடு வருவாய்த்துறை அலுவலா் சங்க மாவட்ட பொருளாளா் ரமேஷ் நன்றி கூறினாா்.