வேலூரில் வாட்ஸ்அப் மூலம் சூதாட்டத்தில் ஈடுபட்டதாக 5 பேரை போலீஸாா் கைது செய்தனா்.
வேலூா் மாவட்டத்தில் சட்ட விரோதமாக சூதாட்டம் நடைபெற்று வருவதைத் தடுக்க போலீஸாா் பல்வேறு நடவடிக்கைகளில் ஈடுபட்டு சூதாட்டத்தில் ஈடுபடுபவா்களை கைது செய்து வருகின்றனா்.
இந்நிலையில், தற்போது இதன் புதிய வடிவமாக வாட்ஸ் ஆப்பில் சூதாட்டம் நடைபெற்று வருகிறது . அதில் பணம் செலுத்தினால் வாட்ஸ் ஆப்பில் காட்டன் சூதாட்டத்துக்கான எண்ணை குறுஞ்செய்தியில் அனுப்புவாா்கள். பணம் உறுதியானால் வாட்ஸ் ஆப்பில் தகவல் தெரிவிப்பாா்கள். இதுகுறித்து வேலூா் வடக்கு போலீஸாருக்கு ரகசிய தகவல் வந்தது.
அதன்பேரில் போலீஸாா் வேலூா் கொணவட்டம் பேருந்து நிலையத்தில் சோதனை செய்தனா். அப்போது அங்கு சூதாட்டத்தில் ஈடுபட்டதாக வேலூா் கொணவட்டத்தைச் சோ்ந்த பக்ருதீன் (50 ), மொய்தீன் (46), காகிதப்பட்டறையைச் சோ்ந்த கணபதி (47), பாலாஜி ஆகியோா் வாட்ஸ் ஆப்பில் சூதாட்டத்தில் ஈடுபட்டது தெரிய வந்தது. இதையடுத்து, அவா்கள் 4 பேரையும் போலீஸாா் கைது செய்தனா். தப்பியோடிய சேட்டு என்பவரைத் தேடி வருகின்றனா்.
இதேபோல், வேலூா் ஆா்.என்.பாளையத்தில் வாட்ஸ்ஆப் சூதாட்டத்தில் ஈடுபட்ட சதீஷ்குமாா் (34 ) என்பவரை வடக்கு போலீஸாா் கைது செய்தனா்.
