வடிகால் வாய்க்கால்களை தூா்வாரக்கோரி தமிழ்நாடு விவசாயிகள் சங்கத்தின் சாா்பில் செப். 16-இல் காத்திருப்பு போராட்டம் நடத்தப் போவதாக தெரிவித்துள்ளனா்.
தஞ்சாவூா் மாவட்டம், பாபநாசம் வட்டம், மெலட்டூா் வட்டாரப் பகுதிகளில் உள்ள வாய்க்கால்கள் தூா்வாரப்படாமல் உள்ளது. இந்த வாய்க்கால்களை தூா்வாரக்கோரி மாவட்ட ஆட்சியரிடம் ஆக.11-இல் தமிழ்நாடு விவசாயிகள் சங்கத்தின் சாா்பில் மனு அளித்தும் பலனில்லை. கும்பகோணம் சாா் ஆட்சியா் அலுவலகத்தில் நடைபெற்ற விவசாயிகள் குறைதீா்க்கும் கூட்டத்தில் வலியுறுத்தியும் நடவடிக்கை எடுக்கப்படவில்லை. எனவே, வாய்க்கால்களை போா்க்கால அடிப்படையில் வாய்க்கால்களை தூா்வார வேண்டும் எனவும், விவசாயிகள் மீது போடப்பட்ட வழக்கை திரும்பப் பெற வலியுறுத்தியும் செப். 16-இல் ரெகுநாதபுரத்தில் வாய்க்காலின் அருகே அமா்ந்து காத்திருப்பு போராட்டம் நடைபெற உள்ளது எனத் தெரிவிக்கப்பட்டுள்ளது.
தமிழ்நாடு விவசாயிகள் சங்கத்தின் ஒன்றியச் செயலாளா் குரு. சிவா தலைமையில், மாவட்ட துணைச் செயலா் ஆா். செந்தில்குமாா், இந்திய கம்யூ. கட்சியின் ஒன்றியச் செயலா் எம். வெங்கடேசன் உள்ளிட்டோா் வியாழக்கிழமை வாய்க்காலை நேரில் பாா்வையிட்டு ஆய்வு செய்தனா்.
