ஆழ்கடல் சுரங்க ஒப்பந்தங்களை ரத்து செய்ய வேண்டும்: பிரதமருக்கு ராகுல் கடிதம்
தில்லியில் செய்தியாளர்களைச் சந்தித்த தமிழக பாஜக தலைவர் அண்ணாமலை விஜய்யை விமர்சித்துப் பேசியுள்ளார்.
மத்திய உள்துறை அமைச்சர் அமித்ஷாவை சந்திக்க தமிழக பாஜக தலைவர் அண்ணாமலை நேற்று தில்லி சென்றார்.
அங்கு அமித்ஷா, பாஜக தேசியத் தலைவர் ஜேபி நட்டா ஆகியோரை சந்தித்த அண்ணாமலை பின்னர் செய்தியாளர்களைச் சந்தித்து பேசினார்.
தேர்தல் கூட்டணி மற்றும் அமித்ஷாவுடனான சந்திப்பு பற்றியும் செய்தியாளர்கள் கேட்ட கேள்விக்கு பதிலளித்த அவர், “பாஜக மாநில தலைவராக எனது கருத்தை கட்சியின் தலைவர்களிடம் தெரிவித்துள்ளேன். கூட்டணி பற்றி பேச இன்னும் நிறைய காலம் இருக்கிறது. பாஜக யாருடன் கூட்டணி என்பது பற்றி இப்போது பேசத் தேவையில்லை. எனக்கு கூட்டணி பற்றி தனிப்பட்ட கருத்து இல்லை.
கட்சிதான் எனக்கு முக்கியம். கட்சியை வலிமைப்படுத்தவே உழைக்கிறேன். பாஜக தேசியத் தலைவர் தேர்தல், மாநிலத் தலைவர் தேர்தல் ஆகியவை விரைவில் நடைபெறவுள்ளது” என்று அவர் தெரிவித்தார்.
விஜய், ஆதவ் அர்ஜுனாவை விமர்சித்த அண்ணாமலை
இன்று நடைபெற்ற தவெக பொதுக்குழு கூட்டத்தில் கட்சியின் தலைவர் விஜய் பிரதமர் மோடியை விமர்சித்துப் பேசினார். அதற்கு பதிலளிக்கும் விதமாகப் பேசிய அண்ணாமலை, "அரசியலைப் பொறுத்தவரை சக்தி வாய்ந்த ஒருவரைப் பற்றிப் பேசினால்தான் ஊடக வெளிச்சம் கிடைக்கும். ராகுல் காந்தியைப் பற்றிப் பேசினால் அது கிடைக்குமா? அதனால்தான், விஜய் பிரதமர் மோடி பற்றிப் பேசுகிறார்.
கட்சி தொடங்கி விஜய் எத்தனை முறை வெளியே வந்தார்? எத்தனை முறை மக்களை சந்தித்தார்? மைக் பிடித்து பேசிவிட்டு அடுத்தவரைக் கை காட்டுவது மட்டுமே அரசியல் அல்ல. களத்திற்கு வந்து வேலை செய்யவேண்டும். நான் களத்தில் வேலை செய்து வருகிறேன்” என்றார்.
தவெக கூட்டத்தில் ஆதவ் அர்ஜுனா அண்ணாமலையை விமர்சித்துப் பேசியிருந்தார். அதுபற்றிப் பேசிய அண்ணாமலை, “திமுகவுக்கு வேலை பார்த்த ஒருவர் அடுத்து விசிகவுக்குத் தாவினார். லாட்டரி பணத்தை வைத்து அடுத்து விஜய் கட்சிக்குத் தாவியிருக்கிறார். அவருடைய எண்ணம் என்னவென்றால் தமிழக வெற்றிக் கழகத்தை ‘லாட்டரி விற்பனைக் கழகம்’ என்று மாற்றவேண்டும் என்பதே. அவர் இன்று என்னைப் பற்றி குறை சொல்கிறார்” என்று பேசினார்.
தொகுதி மறுசீரமைப்பு
தொகுதி மறுசீரமைப்பு பற்றி விஜய் வைத்த விமர்சனத்திற்கு பதிலளித்த அண்ணாமலை, “1973-ல் தொகுதி மறுசீரமைப்பு நடந்தபோது, இந்தியாவின் மக்களவைத் தொகுதிகள் எண்ணிக்கை 525-ல் இருந்து 545 ஆக உயர்த்தப்பட்டன. 20 இடங்கள் கூடுதலாக்கப்பட்டபோது தமிழகத்திற்கு ஒரு இடம் கூட கிடைக்கவில்லை.
அப்போது தமிழ்நாட்டில் திமுகவும், மத்தியில் காங்கிரஸும் ஆட்சியில் இருந்தன. அனைத்து கட்சி கூட்டத்தில் பங்கேற்ற கருணாநிதி தமிழ்நாட்டிற்கென எதையும் வாங்கவில்லை. இதற்கு, விஜய் காங்கிரஸ் மற்றும் திமுக மீதுதான் குற்றம் சாட்ட வேண்டும்.
அடுத்து 2026-ல் தொகுதி மறுசீரமைப்பில் தமிழகத்திற்கு தொகுதி குறைவாகக் கிடைத்தால் பத்திரிகையாளர்கள் அப்போது என்னிடம் கேளுங்கள். விஜய் அரசியல் புரிதலோடு பேச வேண்டும்” என்றார்.
ரெட் ஜெயண்ட் மூவிஸ்
ரெட் ஜெயண்ட் நிறுவனக்கும் விஜய்க்கும் உள்ள தொடர்பு பற்றிப் பேசிய அவர், “மீடியாவை தற்போது கட்டுப்பாட்டில் வைத்திருக்கும் ரெட் ஜெயண்ட் மூவிஸ் நிறுவனத்துக்கு குருவி படத்தின் மூலம் திறப்பு விழா நடத்தியதே விஜய்தான். அவருடைய பீஸ்ட் போன்ற படங்களின் தயாரிப்பு மற்றும் விநியோகத்தை அந்த நிறுவனமே பார்த்துக் கொண்டது.
திமுகவுடன் பாஜகவை இணைத்து விமர்சிக்கும் முன்பு விஜய் தன்னைத் தானே கேள்வி கேட்டுக் கொள்ள வேண்டும்” என்றார்.
