வேங்கைவயல் : ``தமிழக காவல்துறை மீது நம்பிக்கை இல்லை..!" - திருமாவளவன்

வேங்கைவயல் வழக்கில் 3 பட்டியலின இளைஞர்கள் மீது குற்றப்பத்திரிகை தாக்கல் செய்திருப்பதற்கு எதிராக நேற்றைய தினம் அறிக்கை ஒன்றை வெளியிட்டிருந்தார் திருமாவளவன். உண்மைக் குற்றவாளிகள் காப்பாற்றப்படுவதாகவும், வழக்கை சிபிஐ-க்கு மாற்ற வேண்டும் என்றும் அவர் கூறியிருந்தார்.

இந்த நிலையில் இன்று செய்தியாளர்களை சந்தித்த திருமாவளவன் தமிழக காவல்துறையின் மீது நம்பிக்கை இழந்துவிட்டதாகத் தெரிவித்துள்ளார்.

அவர் பேசியதாவது, "வேங்கைவயல் பிரச்னையில் சிபிசிஐடி விசாரணை ஏமாற்றத்தை அளித்துள்ளது. ஊள்ளூர் குற்றப்பிரிவு காவலர்கள் விசாரிக்கக் கூடாது, சிறப்பு புலனாய்வு விசாரணைத் தேவை என நாம் வைத்த கோரிக்கையின் அடிப்படையில் சிபிசிஐடி நியமிக்கப்பட்டது. ஆனால் இரண்டு ஆண்டு கால விசாரணைக்குப் பிறகு புகார் அளித்தவர்களே, பாதிக்கப்பட்டவர்களே குற்றவாளிகள் எனக் கூறியிருப்பது அதிர்ச்சியளிக்கிறது.

இந்த வழக்குக்காக நியமிக்கப்பட்டுள்ள சிறப்பு நீதிமன்றம் இந்த குற்றப்பத்திரிகையை விசாரணைக்கு எடுத்துக்கொள்ளக் கூடாது என வலியுறுத்துகிறோம். தமிழ்நாடு அரசு இந்த வழக்கை சிபிஐக்கு மாற்ற வேண்டும் என கோரிக்கை வைக்கிறோம்.

வேங்கைவயல் கிராம மக்களும் விடுதலை சிறுத்தைகள் கட்சியினரும் இன்று காலையில் காவல்துறையின் போக்கைக் கண்டித்து போராட்டத்தில் ஈடுபட்டிருந்தனர். அவர்களை அச்சுறுத்தி அந்த பகுதியின் விசிக நிர்வாகிகளைக் கைது செய்திருப்பது வன்மையாக கண்டிக்கத்தக்கது.

திமுக அரசு சமூக நீதியின் பக்கம் நிற்கும் என்றும், பாதிக்கப்பட்ட மக்களுக்கு நீதிகிடைக்க அரசு துணையாக இருக்கும் என்றும் நம்புகிறோம்.

காவல்துறையின் போக்கை, இந்த குற்றப்பத்திரிகையை தமிழக அரசு ஏற்கக் கூடாது.

காவல்துறையினர் வெளியிட்டுள்ள ஆடியோ, வீடியோ எல்லாம் ஏற்கெனவே வாட்ஸ்அப்பில் பரவியவைதான். புதிதாக ஒன்றுமில்லை. அவர்கள் டி.என்.ஏ பரிசோதனை செய்வதாகவும் அதற்காகத்தான் இவ்வளவு நாட்கள் எடுத்துக்கொண்டதாகவும் கூறியுள்ளனர். ஆனால் டி.என்.ஏ பரிசோதனையின் அடிப்படையில் குற்றம் நிரூபிக்கப்பட்டதாகத் தெரியவில்லை.

ஏற்கெனவே குற்றப்பிரிவு காவலர்கள் பட்டியலின இளைஞர்களை குற்றத்தை ஒப்புக்கொள்ளச் சொல்லி தாக்கியுள்ளனர். மேலும் சிபிசிஐடி காவலர்களும் அவர்களிடம், "நீங்கள் ஒப்புக்கொள்ளாவிட்டால் பிரச்னை ஏற்படும்" என மிரட்டியுள்ளனர். இவற்றையெல்லாம் நாங்கள் முதல்வரின் கவனத்துக்கு எடுத்துச் சென்றோம். இருப்பினும் அதே வழியில் குற்றப்பத்திரிகை தாக்கல் செய்யப்பட்டது அதிர்ச்சியாக உள்ளது.

சிபிஐ மீதும் எங்களுக்கு 100% நம்பிக்கை இல்லை. தமிழ்நாடு காவல்துறை மீது நம்பிக்கை இழந்ததால் சிபிஐ விசாரணையைக் கோருகிறோம். வேறு வழியில்லை." என்றார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்https://bit.ly/3OITqxs

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://bit.ly/3OITqxs