குடும்பமே முக்கியம்..! இலங்கை தொடரிலிருந்து கம்மின்ஸ் விலகல்!
’வேண்டாம்’ இப்போது எப்படியிருக்கிறார்... ரூ.22 லட்சம் சம்பளத்தில் ஜப்பானுக்கு சென்றுவிட்டாரா?
Admin
- 2 days ago
திருத்தணியைச் சேர்ந்த 'வேண்டாம்’ என்கிற மாணவியை நினைவிருக்கிறதா..? கொரோனாவுக்கு முன்னால் பரபரப்பாக பேசப்பட்ட சிலரில் மிக முக்கியமானவர் இந்த மாணவி. இவருடைய ’வேண்டாம்’ என்கிற பெயருக்காக மட்டுமல்ல, கேம்பஸ் இன்டர்வியூவில் ஜப்பானிய கம்பெனி ஒன்றில் வேலை பார்க்க இவர் செலக்ட் ஆகி இருந்ததும், வருடம் 22 லட்சம் ரூபாய் இவருடைய பேக்கேஜ் என்பதும் கூடத்தான் இவர் தமிழ்நாடு முழுக்க பரபரப்பாக பேசப்பட்டதற்கு முக்கியமான காரணம்.
வேண்டாம் இப்போது எப்படி இருக்கிறார், என்ன செய்கிறார் என்று போன் செய்து விசாரித்தோம்.
"எங்க வீட்ல நாங்க நாலு பொண்ணுங்க. மூணாவதா நான் பொறந்தப்போ ஊருக்குள்ள பலரும் எங்க அம்மாவையும் அப்பாவையும் ரொம்ப கேலி பேசினாங்களாம். அதனால, எங்க பாட்டி ’இந்தப் பொண்ணுக்கு அதாவது எனக்கு `வேண்டாம்’னு பேர் வெச்சா அடுத்ததா பிறக்கிற குழந்தை கண்டிப்பா பையனா தான் பிறக்கும்னு சொன்னாங்களாம். எனக்கு `வேண்டாம்’னு பேர் வந்த கதை இதுதான். ஆனா, எனக்கு அடுத்து பொறந்ததும் தங்கச்சி பாப்பா தான்.” என பெயர்க் காரணத்தை சிம்பிளாக விளக்கினார்.
மேலும் தொடர்ந்தவர், ```அக்காங்களுக்கு ஷன்மதி, யுவராணி, தங்கச்சிக்கு சரண்யானு அழகழகா பேர் வெச்சிருக்கீங்க. எனக்கு மட்டும் இப்படி ஒரு பேரை வச்சு ஸ்கூல், காலேஜ்னு வெளியில போற வர்ற இடங்கள்ல எல்லாம் என்னை எல்லோரும் கேலி, கிண்டல் செய்ற மாதிரி பண்ணிட்டீங்கல்ல’ அப்படின்னு அப்பாகிட்டயும் அம்மாகிட்டயும் அடிக்கடி சண்டை போடுவேன். ஆனாலும் அந்தக் கோபம் எல்லாம் கொஞ்ச நேரம்தான் இருக்கும். ஏன்னா எங்க அப்பா தறி நெய்கிற வேலை, விவசாயம்னு கடுமையா உழைச்சு எங்க நாலு பேரையும் நல்லா படிக்க வச்சிருக்கார்.
மூத்த அக்கா இங்கிலீஷ் லிட்ரேச்சர், ரெண்டாவது அக்கா பிஎஸ்சி. ரெண்டு பேருக்குமே நல்லபடியா கல்யாணம் பண்ணி கொடுத்துட்டாரு. மூணாவது நானு. நான் இன்ஜினியரிங் படிச்சுக்கிட்டு இருந்தப்போ தான் கேம்பஸ் இன்டர்வியூவுல ஜப்பான்ல வேலை கிடைச்சு நீங்க என்கிட்ட பேசினீங்க. என் தங்கச்சி பி.எஸ்சி படிச்சிருக்கா’’ என்றவர், தற்போது என்ன செய்துகொண்டிருக்கிறார் என்பதையும் நம்முடன் பகிர்ந்து கொண்டார்.
"ஜப்பான்ல வேலை கிடைச்சது. ஆனா, கொரோனா காரணமா உலகமே ஸ்தம்பிச்சு போனதால அந்த வாய்ப்பு அப்போ கைநழுவிப் போயிடுச்சு. ஆனா 2023-ல மறுபடியும் ஜப்பான்ல இருந்து வேலைக்கு கூப்பிட்டாங்க. 2022-ல எனக்கு உடம்பு சரியில்லாம போனதால, அந்த நேரத்துலேயும் என்னால அந்த வாய்ப்பை பயன்படுத்திக்க முடியல.
இப்போ இந்தியாவுல ஒரு தனியார் கம்பெனியில் வேலை பார்த்துட்டிருக்கேன். இங்கேயும் ஒரு ஜப்பான் புராஜெக்ட் தான் பண்ணிட்டிருக்கேன். இப்போ நான் டெக்னிக்கல் லீடா அந்த கம்பெனியில இருக்கேன். சம்டைம்ஸ் யாராவது என் பெயருக்கு என்ன அர்த்தம்னு கேட்பாங்க. காலேஜ் படிக்கிறப்ப எல்லாம் இப்படி யாராவது கேட்டா ரொம்ப வருத்தமா இருக்கும்.
பேர் வெச்ச பாட்டி மேல கோவம்கூட வரும். மத்தவங்களோட கேலி, கிண்டல் காரணமா அழுகைகூட வந்து இருக்கு. ஆனா, இப்ப அப்படியெல்லாம் இல்ல மேடம்... என் பேருக்கு அர்த்தம் கேட்கறவங்க கிட்ட அதுக்கான அர்த்தத்தை இங்கிலீஷ்ல சொல்லிட்டு கூலா கடந்து போயிடுவேன். அந்த அளவுக்கு மெச்சூரிட்டி வந்துடுச்சு’’ என்றவரிடம், ’உங்களுக்கு வேண்டாம் என்று பெயர் வைத்த பாட்டி எப்படி இருக்கிறார்கள்’ என்றோம்.
’’பாட்டி இறந்துட்டாங்க’’ என்று வருத்தத்தோடு ஷேர் சொன்னவரிடம், ’உங்களுக்குப் பிடித்த பேரை மாற்றிக்கொள்ளப் போறதாக சொன்னீர்களே, அது என்னவாயிற்று’ என்றோம்.
’’என்னோட ஜாதக பேர் கல்பனா. அந்தப் பேரை தான் கெசட்டில் மாத்திக்கப் போறேன். வேலை ரொம்ப டைட்டா இருக்கு, அப்பாவும் என் பேரை கெசட்டில் மாற்றுவது தொடர்பா ரெண்டு, மூணு தடவை சம்பந்தப்பட்ட ஆஃபீஸ்க்கு போயிட்டு வந்துட்டாரு. ஆனா, இன்னும் பேர் இன்னும் மாத்த முடியல. அந்த பிராசஸ் போயிட்டு இருக்குங்க மேம். அப்பாவும் ரொம்ப பிசியா இருக்கறதுனால பேர் மாத்துற வேலைய சட்டுன்னு முடிக்க முடியல. அடுத்த தடவை நீங்க பேசுறப்போ கல்பனான்னு எனக்குப் பிடிச்ச பேர சொல்லி கூப்டாலும் கூப்டுவீங்க’’ என்று செம பாசிட்டிவாக பேசி முடித்தார் `வேண்டாம்’.
நீங்கள் விரும்பி படித்த தொடர்கள், இப்போது ஆடியோ வடிவில்... புத்தம் புதிய விகடன் ப்ளே... உங்கள் அன்றாட பணிகளை கவனித்துக் கொண்டே ரசித்து கேட்க, உடனே இன்ஸ்டால் செய்யுங்கள்...
