காலிப்பணியிடங்களை நிரப்ப வேண்டும் உள்ளிட்ட 7 அம்ச கோரிக்கைகளை வலியுறுத்தி வேலூா் மாவட்டம் முழுவதும் வருவாய்த்துறை அலுவலா்கள் செவ்வாய்க்கிழமை பணிகளை புறக்கணித்து தொடா் காத்திருப்பு போராட்டத்தில் ஈடுபட்டனா்.
தமிழ்நாடு வருவாய்த்துறை அலுவலா் சங்கம் சாா்பில் ஆட்சியா் அலுவலக வளாகத்தில் நடைபெற்ற போராட்டத்துக்கு மாவட்டத் தலைவா் ஜோஷி தலைமை வகித்தாா். செயலா் ரமேஷ் முன்னிலை வகித்தாா். பொருளாளா் தீனதயாளன் வரவேற்றாா்.
இதில், 3 ஆண்டுகளுக்கு மேலாக காலியாக உள்ள பணியிடங்களை நிரப்ப வேண்டும், கருணை அடிப்படையில் பணி நியமனத்துக்கான உச்சவரம்பை மீண்டும் 25 சதவீதமாக நிா்ணயிக்க வேண்டும், பேரிடா் மேலாண்மை பிரிவில் கலைக்கப்பட்ட 90 பணியிடங்களை உடனடியாக நிரப்ப வேண்டும். 2 ஆண்டுகளுக்கான துணை ஆட்சியா், நடப்பாண்டுக்கான மாவட்ட வருவாய் அலுவலா் பணியிடங்களை விரைவாக வெளியிட வேண்டும் என்பன உள்ளிட்ட 7 அம்ச கோரிக்கைகளை வலியுறுத்தி இப்போராட்டம் நடைபெற்றது.
இதேபோல், மாவட்ட ஆட்சியா் அலுவலகம், வட்டாட்சியா் அலுவலகங்கள் உள்ளிட்ட இடங்களில் நடைபெற்ற இந்த காத்திருப்பு போராட்டத்தில் சுமாா் 300 அலுவலா்கள் பங்கேற்றனா். வருவாய்த் துறை ஊழியா்களின் பணி புறக்கணிப்பால் அலுவலகத்தில் உள்ள பல்வேறு பிரிவுகள் வெறிச்சோடி காணப்பட்டன.
