வேளச்சேரி எம்எல்ஏ தொடா்ந்த வழக்கில் தோ்தல் ஆணையம் பதிலளிக்க உத்தரவு

தோ்தல் செலவு கணக்கை முறையாக தாக்கல் செய்யாததால் ஏன் தகுதிநீக்கம் செய்யக்கூடாது? என விளக்கம் கேட்டு அனுப்பப்பட்ட நோட்டீஸை எதிா்த்து வேளச்சேரி எம்எல்ஏ அசன் மௌலானா தாக்கல் செய்த மனுவுக்கு தோ்தல் ஆணையம் பதிலளிக்க சென்னை உயா்நீதிமன்றம் உத்தரவிட்டது.

கடந்த 2021-ஆம் ஆண்டு நடந்த சட்டப்பேரவைத் தோ்தலில் வேளச்சேரி தொகுதியில் காங்கிரஸ் சாா்பில் போட்டியிட்டு வெற்றி பெற்றவா் அசன் மௌலானா. இந்த தோ்தலில் செலவு கணக்கை முறையாக தாக்கல் செய்யாததால் ஏன் பதவிநீக்கம் செய்யக்கூடாது? என விளக்கம் கேட்டு தோ்தல் ஆணையம் அனுப்பிய நோட்டீஸை எதிா்த்து சென்னை உயா்நீதிமன்றத்தில் வழக்குத் தொடா்ந்தாா்.

அவா் தாக்கல் செய்த மனுவில், 2021-ம் ஆண்டு நடந்த சட்டப்பேரவைத் தோ்தலில் திமுக கூட்டணியில் போட்டியிடும் காங்கிரஸ் உள்ளிட்ட கூட்டணிக் கட்சி வேட்பாளா்களை ஆதரித்து காங்கிரஸ் கட்சியின் தேசிய தலைவா் ராகுல்காந்தி கடந்த 2021-ஆம் ஆண்டு மாா்ச் 28-ஆம் தேதி சென்னை மற்றும் சேலத்தில் பிரசாரம் செய்தாா்.

இதற்காக காங்கிரஸ் கட்சி சாா்பில் நாளிதழ்களில் 2 நாள்கள் விளம்பரம் கொடுக்கப்பட்டது. அதில் எனது புகைப்படம் உள்ளிட்ட மற்ற கட்சித் தலைவா்கள், வேட்பாளா்களின் புகைப்படங்களும் இடம்பெற்றிருந்தன.இந்த விளம்பரத்தை நான் கொடுத்ததாகவும், இதற்காக ரூ.31.53 லட்சம் செலவு செய்ததாகக் கூறி தோ்தல் ஆணையம் விளக்கம் கேட்டது. இதுதொடா்பாக உரிய விளக்கம் அளித்தேன்.

ஆனால், முறையாக தோ்தல் செலவுக் கணக்கை தாக்கல் செய்யாததால் ஏன் தகுதி நீக்கம் செய்யக்கூடாது என விளக்கம் கேட்டு நோட்டீஸ் அனுப்பியது. இதற்கு 2023-ஆம் ஆண்டு ஏப்ரல், ஜூலை மாதங்களில் விளக்கம் அளித்தேன். அதன்பின்னா் தோ்தல் ஆணையத்திடம் இருந்து எந்த பதிலும் வரவில்லை. ஆனால், தற்போது விசாரணைக்கு நேரில் ஆஜராக வேண்டும் என்று தோ்தல் ஆணையம் நோட்டீஸ் அனுப்பியுள்ளது.

தோ்தல் ஆணையத்தின் வாக்குத் திருட்டை அம்பலப்படுத்தி உள்ளதால், உள்நோக்கத்துடன் இரண்டு ஆண்டுகளுக்குப் பிறகு விசாரணைக்கு ஆஜராகும்படி நோட்டீஸ் அனுப்பப்பட்டுள்ளது. எனவே, ஏன் தகுதிநீக்கம் செய்யக்கூடாது என தோ்தல் ஆணையம் அனுப்பிய நோட்டீஸை ரத்து செய்ய வேண்டும் என கூறியிருந்தாா்.

இந்த வழக்கு தலைமை நீதிபதி எம்.எம்.ஸ்ரீவாஸ்தவா மற்றும் நீதிபதி ஜி.அருள்முருகன் ஆகியோா் அடங்கிய அமா்வில் விசாரணைக்கு வந்தது. அப்போது மனுதாரா் தரப்பில் ஆஜரான மூத்த வழக்குரைஞா் பி.வில்சன், மனுதாரரின் எம்எல்ஏ பதவிக்காலம் முடிய இன்னும் 10 மாதங்களே இருக்கும் நிலையில், இதுபோல நோட்டீஸ் அனுப்பியது உள்நோக்கம் கொண்டது. எனவே, அந்த நோட்டீஸை ரத்து செய்ய வேண்டும் என்று வாதிட்டாா்.

இதையடுத்து வழக்கை விசாரித்த நீதிபதிகள், இந்த மனுவுக்கு தோ்தல் ஆணையம் இரண்டு வாரங்களுக்குள் பதிலளிக்க உத்தரவிட்டு விசாரணையை ஒத்திவைத்தனா்.