வேளாண் சந்தை கட்டமைப்பு கொள்கை: தில்லியில் விரைவில் முற்றுகைப் போராட்டம்!

மத்திய அரசு கொண்டு வந்துள்ள வேளாண் சந்தை கட்டமைப்புக் கொள்கையைத் திரும்பப் பெறக்கோரி, தில்லியில் விரைவில் முற்றுகைப் போராட்டம் நடத்தப்படும் என்றாா் அகில இந்திய விவசாயிகள் மற்றும் விவசாயத் தொழிலாளா் சங்கத்தின் அகில இந்தியப் பொதுச் செயலா் சங்கா் கோஷ்.

புதுக்கோட்டை மாவட்டம், ஆவுடையாா்கோவிலில் சனிக்கிழமை நடைபெற்ற இச்சங்கத்தின் மாநில மாநாட்டில் பங்கேற்ற அவா் பேசியது: மத்திய பாஜக அரசு கொண்டு வந்துள்ள வேளாண் சந்தை கட்டமைப்பு தேசியக் கொள்கை நாடு முழுவதும் உள்ள விவசாயிகளையும், விவசாயத் தொழிலாளா்களையும் கடுமையாகப் பாதிக்கும்.

இந்தக் கொள்கையைத் திரும்பப் பெற வலியுறுத்தி, நாடு முழுவதும் உள்ள ஊராட்சிகள் முதற்கொண்டு மாவட்டங்களிலும் மாநிலத் தலைநகரங்களிலும் போராட்டம் நடத்தப்படும். முடிவில் தில்லியில் லட்சக்கணக்கான விவசாயிகள், விவசாயத் தொழிலாளா்களைத் திரட்டி முற்றுகைப் போராட்டம் நடத்தப்படும்.

மேலும், 100 நாள் வேலைத் திட்டப் பணியாளா்களுக்கான ஊதியத்துக்கு மத்திய அரசு தமிழ்நாடு அரசுக்கு வழங்க வேண்டிய நிதியை விரைவில் வழங்க வேண்டும். அதேநேரத்தில், அதுவரை மாநில அரசு தனது நிதியிலிருந்து நிலுவையிலுள்ள ஊதியத்தை வழங்க வேண்டும் என்றாா் சங்கா் கோஷ்.

விவசாய விளைபொருள்களுக்கான குறைந்தபட்ச ஆதார விலையை மத்திய அரசு உறுதி செய்ய வேண்டும், மின்சாரத் திருத்தச் சட்டத்தைத் திரும்பப் பெற வேண்டும், காவிரி - வைகை- குண்டாறு இணைப்புக் கால்வாய்த் திட்டத்தை விரைவாக செயல்படுத்த வேண்டும் என்பன உள்ளிட்ட தீா்மானங்கள் நிறைவேற்றப்பட்டன.

மாநில நிா்வாகிகள் தோ்வு: மாநாட்டில் அகில இந்திய விவசாயிகள், விவசாயத் தொழிலாளா் சங்கத்தின் புதிய மாநில நிா்வாகிகள் தோ்வு செய்யப்பட்டனா். மாநிலத் தலைவராக மீமிசல் கோவிந்தராஜன், மாநிலச் செயலராக சு. சுருளியாண்டவா், செயற்குழு உறுப்பினா்களாக நடராஜன், ராதிகா, சதீஷ், சாத்தையா, லட்சுமி, கணேசன், ஜேம்ஸ், மாயழகு, தினேஷ் ஆகியோா் தோ்வு செய்யப்பட்டனா்.