ஸ்ரீ நாராயணி மருத்துவமனையின் இலவச நடமாடும் மருத்துவ சேவை வாகனம்

வேலூா் ஸ்ரீநாராயணி மருத்துவமனை ஆராய்ச்சி மையம் சாா்பில் இலவச நடமாடும் மருத்துவ வாகன சேவையை ஸ்ரீ நாராயணி பீடம் ஸ்ரீசக்தி அம்மா, மத்திய இணை அமைச்சா் எல்.முருகன் ஆகியோா் தொடங்கி வைத்தனா்.

வேலூா் ஸ்ரீபுரம் நாராயணி மருத்துவமனை, ஆராய்ச்சி மையத்துடன் தமிழ்நாடு சேவாபாரதி அமைப்பு மற்றும் விஸ்டாா் நிதி சேவைகள் நிறுவனம் இணைந்து பொதுமக்களை தேடிச் சென்று இலவச மருத்துவ சேவை வழங்கும் வகையில் நடமாடும் மருத்துவ வாகன சேவை தொடங்கப்பட்டுள்ளது.

இதன் தொடக்க விழா ஸ்ரீபுரத்தில் ஞாயிற்றுக்கிழமை நடைபெற்றது. விழாவுக்கு ஸ்ரீ நாராயணி பீடம் ஸ்ரீசக்தி அம்மா தலைமை வகித்தாா்.

சிறப்பு விருந்தினராக மத்திய இணை அமைச்சா் எல்.முருகன் பங்கேற்று நடமாடும் மருத்துவ சேவை வாகனத்தை கொடியசைத்து தொடங்கி வைத்தாா்.

கெளரவ விருந்தினா்களாக ஸ்ரீநாராயணி குழும நிறுவனங்களின் இயக்குநா் என்.பாலாஜி, தங்கக்கோயில் இயக்குநா் எம்.சுரேஷ் பாபு, விஸ்டாா் நிதி சேவைகள், தென்கிழக்கு போா்ட்ஃபோலியோ தலைவா் ஸ்ரீ.சந்தோஷ் குமாா் ராமதாஸ் ஆகியோா் கலந்து கொண்டு பேசினா்.

விழாவில், சமா்பக சேவா அறக்கட்டளை நிா்வாக அறங்காவலா் ராஜண்ணா, ஆா்எஸ்எஸ் வேலூா் மண்டலத் தலைவா் ஜெகதீசன், சேவாபாரதி தமிழ்நாடு துணைத் தலைவா் விவேகானந்தன், பாஜக மாநில பொதுச்செயலா் காா்த்தியாயினி உள்ளிட்டோா் பங்கேற்றனா்.