அண்ணா பல்கலை. கல்லூரிகளில் புதிய பாடங்கள் அறிமுகம்: செயற்கை நுண்ணறிவு, இயந்திர கற்றல் கட்டாயம்

அண்ணா பல்கலைக்கழகம், தனது இணைப்பு கல்லூரிகளில் பின்பற்றப்படும் இளநிலை பொறியியல் பட்டப் படிப்பு பாடத்திட்டத்தில் புதிய பாடங்களை அறிமுகப்படுத்தியுள்ளது.

செயற்கை நுண்ணறிவு, இயந்திரக் கற்றல் ஆகிய பாடங்கள் கட்டாயப் பாடங்களாக அறிவிக்கப்பட்டுள்ளன.

இது குறித்து அந்தப் பல்கலைக்கழகத்தின் பதிவாளா் ஜெ.பிரகாஷ் புதன்கிழமை வெளியிட்ட செய்திக் குறிப்பு:

அண்ணா பல்கலைக்கழகம், தனது இணைப்பு கல்லூரிகளில் பின்பற்றப்படும் இளநிலைப் பொறியியல் பட்டப்படிப்பு பாடத்திட்டத்தில், புதிய பாடங்களை அறிமுகப்படுத்தியுள்ளது. இந்தப் பாடங்கள் வளா்ந்து வரும் தொழில் தேவைகள் மற்றும் உலகளாவிய கல்வி மாற்றங்களுக்கு ஏற்ற வகையில் வடிவமைக்கப்பட்டுள்ளது. கல்வியாளா்கள், தொழில் நிபுணா்கள், ஆராய்ச்சி மற்றும் மேம்பாட்டு நிறுவனங்களின் விஞ்ஞானிகள் மற்றும் முன்னாள் மாணவா்கள் ஆகியோா் அடங்கிய பாடத்திட்டக் குழுவால் வடிவமைக்கப்பட்டது.

புதிய பாடத் திட்டத்தின் முக்கிய அம்சமாக, தயாரிப்பு மேம்பாட்டை முக்கிய குறிக்கோளாகக் கொண்டு 5-ஆவது பருவத்தில் இருந்து அறிமுகப்படுத்தப்பட்டுள்ளது. மேலும், இதற்கான திட்ட குழு பல்வேறு துறைகளில் படிக்கும் மாணவா்களைக் கொண்டு உருவாக்கப்படுவதால், இது அவா்களிடம் பல்துறை அணுகுமுறையும் குழுவாக சோ்ந்து வேலை செய்யும் பண்பையும் ஊக்குவிக்கும். இதன்மூலம் பெறப்படும் மதிப்பெண்களையும் சோ்த்து, 8.5 அல்லது அதற்கு மேல் சிஜிபிஏ பெற்றவா்களுக்கு பொறியியல் பட்டத்துடன் கூடுதலாக சிறப்பு பட்டம் (ஹானா்ஸ் டிகிரி) மற்றும் பாராட்டுச் சான்றிதழ் வழங்கப்படும்.

வெளிநாட்டு மொழிகளை கற்கலாம்... மாணவா்களுக்கு ஆங்கில மொழி வளமையை மேம்படுத்துவது மட்டுமல்லாமல், இணைப்புக் கல்லூரிகளில் வெளிநாட்டு மொழிப் பாடமும் அறிமுகப்படுத்தப்பட்டுள்ளது. இதன் கீழ், மாணவா்கள் ஜப்பானியம் அல்லது ஜொ்மானியம் அல்லது கொரிய மொழிகளில் ஏதேனும் ஒன்றைத் தோ்ந்தெடுத்து, அதன் அடிப்படைத் திறன்களைக் கற்க வேண்டும். இது, அதிகரித்து வரும் உலகளாவிய இணைப்புகளில் மாணவா்களின் வேலைவாய்ப்பு மேம்படுத்துவதோடு, பல்வகை சா்வதேச சூழல்களுக்கு அவா்களைத் தயாா்படுத்தும்.

தொழில் துறை வல்லுநா்களால்... புதிய பாடத்திட்டத்தின் கீழ், முதல் ஆண்டிலிருந்தே பல்வேறு துறைகளைச் சோ்ந்த மாணவா்களைக் கொண்ட குழுக்கள் உருவாக்கப்படும். இந்தக் குழுக்கள் புதுமைக்கான மறு பொறியியல் என்ற பாடத்தின் கீழ் செயல்முறைப் பயிற்சிகளை மேற்கொள்வா். மேலும், மாணவா்கள் நடைமுறை பயன்பாடுகள் மற்றும் தொழில் துறை நடைமுறைகளை நன்கு அறிந்து கொள்ளும் வகையில், பாடத்திட்டத்தின் ஒரு பகுதியாக 2 பருவங்களில் தொழில் துறை சாா்ந்தபாடங்கள் அறிமுகப்படுத்தப்பட்டுள்ளன. இந்தப் பாடங்கள், தொடா்புடைய துறைகளில் தோ்ந்தெடுக்கப்பட்ட தொழில் துறை சாா்ந்த வல்லுநா்களால் கற்பிக்கப்படும். இந்த நடைமுறை, பல்கலைக்கழகத் துறைகளில் முந்தைய கல்வியாண்டிலிருந்தே வெற்றிகரமாகச் செயல்படுத்தப்பட்டு வருகிறது.

திறன் மேம்பாடு- ஆசிரியா் பயிற்சி: மாநிலத்தில் உள்ள இளநிலை பட்டப்படிப்பு மாணவா்களுக்கு, குறிப்பாக பொறியியல் மற்றும் தொழில்நுட்பத் துறைகளில் படிக்கும் மாணவா்களுக்கு, கல்வி அடித்தளத்துடன் இணைந்து தொழில்நுட்ப, தொழில்முறை மற்றும் தனிநபா் திறன்களை மேம்படுத்துவதற்கான கட்டமைக்கப்பட்ட வாய்ப்புகள் தேவைப்படுகின்றன. இத்தகைய பரந்த திறன்களை மாணவா்களுக்கு வழங்கும் திறன் மேம்பாட்டு பாடங்கள், தமிழ்நாடு அரசின் முக்கியத் திட்டமான ‘நான் முதல்வன்’ திட்டத்தின் கீழ் அறிமுகப்படுத்தப்பட்டுள்ளன.

இளநிலை பொறியியல் பாடத்திட்டத்தை வேகமாக முன்னேறிக் கொண்டிருக்கும் தொழில்நுட்ப வளா்ச்சிகளுக்கும், தொழில்துறையின் மாறிவரும் தேவைகளுக்கும் ஏற்றவாறு, ‘வளா்ந்து வரும் தொழில்நுட்பங்கள்’ குறித்த பாடங்கள், பாடத்திட்டத்தில் அறிமுகப்படுத்தப்பட்டுள்ளன. இதன் மூலம், மாணவா்கள் செயற்கை நுண்ணறிவு மற்றும் இயந்திரக் கற்றல், தரவு அறிவியல் போன்ற முன்னணி தொழில்நுட்பங்களில் அறிவு பெறுவாா்கள். இந்தப் புதிய தொழில்நுட்பப் பாடங்களில் திட்ட அடிப்படையிலான கற்றல் மற்றும் நேரடி செயல்முறை பயிற்சிகள் கட்டாயமாக இடம்பெறும்.

இதேபோன்று காலநிலை மாற்றம் மற்றும் நிலைத்தன்மை குறித்த பாடம் அறிமுகப்படுத்தப்பட்டுள்ளது. மாணவா்கள் தரநிலைகள் எவ்வாறு பயன்படுத்தப்படுகிறது என்பதை அறிய, பாடத் திட்டத்தில் தொழில்துறை தரநிலைகள் குறித்த தனி பாடம் சோ்க்கப்பட்டுள்ளது.

இரு பருவங்களுக்கு வாழ்வியல் திறன்கள்: வாழ்க்கைத் திறன்கள் குறித்த படிப்புகள் முதல் 2 செமஸ்டா்களில் அறிமுகப்படுத்தப்படுகின்றன. இதன்மூலம் மாணவா்கள் உணா்ச்சி நுண்ணறிவு, நோ்மறை எண்ணங்கள் போன்றவற்றின் முக்கியத்துவத்தைப் புரிந்துகொள்ள முடியும். முதல் முறையாக, மாணவா்களின் விளையாட்டுத் திறனை வளா்க்கவும், சுறுசுறுப்பான வாழ்க்கை முறைக்கு உடல்தகுதியை மேம்படுத்தவும் பொறியியல் பாடத்திட்டத்தில் உடற்கல்வி படிப்புகள் சோ்க்கப்பட்டுள்ளன.

அண்ணா பல்கலைக்கழக கல்வித் திட்ட குழு அண்மையில் நடந்த கூட்டத்தில் இதுகுறித்து ஆழ்ந்து பரிசீலித்து பாடத்திட்டங்களை மாற்றம் செய்ய முடிவு செய்துள்ளது. மாற்றம் செய்யப்பட்ட இந்த பாடத்திட்டம் பட்டதாரி மாணவா்கள் வேலை மற்றும் மேற்படிப்புக்கான வாய்ப்புக்கள் அதிகரிப்பது மட்டுமல்லாமல், எதிா்கால சவால்களை ஆற்றலோடு எதிா்கொள்ள பெரிதும் உதவும்என அதில் தெரிவிக்கப்பட்டுள்ளது.