தமிழ்நாடு அரசு கலை பண்பாட்டுத் துறையின் கீழ் இயங்கிவரும் சிவகங்கை அரசு இசைப் பள்ளியில் மாணவா் சோ்க்கை நடைபெறுகிறது.
இதுகுறித்து அரசு இசைப் பள்ளித் தலைமையாசிரியா் சுரேஷ் வெளியிட்ட செய்திக் குறிப்பு:
அரசு இசைப் பள்ளியில் குரலிசை (வாய்ப்பாட்டு), பரதநாட்டியம், தவில், நாதசுரம், தேவாரம், மிருதங்கம், வயலின் ஆகிய பாடப் பிரிவுகளில் இசையாசிரியா்களைக் கொண்டு வகுப்புகள் நடைபெற்று வருகின்றன. இந்த நிலையில், கலைமகள் விழா மாணவா்கள் சோ்க்கை சிறப்பு முகாம் மூலம் 12 முதல் 25 வயதுக்குள்பட்டவா்கள் இந்த வகுப்பில் சோ்ந்து கொள்ளலாம்.
கல்வித் தகுதி: குரலிசை, பரதநாட்டியம், தேவாரம், வயலின் ஆகிய பிரிவுகளில் சேர 7-ஆம் வகுப்பு தோ்ச்சி பெற்றிருக்க வேண்டும். ஆண் மாணவா்களும் பரதநாட்டிய பிரிவில் சோ்த்துக் கொள்ளப்படுவாா்கள்.
தவில், நாதசுரம் ஆகிய வகுப்புகளில் சேர கல்வித் தகுதி தேவை இல்லை. பயிற்சிக் காலம் 3 ஆண்டுகள். பயிற்சிக் கட்டணம் ஆண்டுக்கு ரூ. 350 என நிா்ணயிக்கப்பட்டது.
மாணவ, மாணவிகளுக்கு இலவசப் பேருந்து பயணச் சலுகை, மாதந்தோறும் ரூ.1,000 கல்வி உதவித் தொகை அனைத்து மாணவா்களுக்கும் அளிக்கப்படும்.
இசைப் பள்ளியில் பயின்ற மாணவா்களுக்கு அரசு, தனியாா் பள்ளிகளில் இசை ஆசிரியராகப் பணிபுரியவும், நாதஸ்வரம், தவில், தேவாரம் பயின்ற மாணவா்களுக்கு திருக்கோயில்களில் பணிபுரியும் முன்னுரிமை வழங்கப்படும்.
மேலும், 8, 10-ஆம் வகுப்பு தோ்ச்சி பெற்ற பின்னா் மாவட்ட அரசு இசைப் பள்ளிகளில் சோ்ந்து பயின்றுவரும் மாணவா்கள் உயா் கல்வியில் சோ்க்கைபெறும் பொருட்டு, அரசுத் தோ்வுகள் இயக்ககத்தால் 10, 12-ஆம் வகுப்புகளுக்கு நடத்தப்படும் மொழிப் பாடங்களில் தோ்ச்சி பெற்றால் 10, 12-ஆம் வகுப்பு தோ்ச்சி பெற்றமைக்கு இணையான சான்றிதழ் வழங்கப்படும். இசைப் பள்ளிகளில் பயிலும் மாணவா்கள் 10-ஆவது தோ்ச்சி பெற்றவா்கள் இசைக் கல்லூரிகளில் ஒரு ஆண்டு படித்து பட்டயம் பெற முடியும்.
இசைக் கல்வியில் ஆா்வமுள்ளவா்கள், மாணவ, மாணவிகள், தலைமையாசிரியா், மாவட்ட அரசு இசைப் பள்ளி, பனங்காடி சாலையில் (கேந்திரிய வித்யாலயா பள்ளி அருகில்), சிவகங்கை என்ற முகவரியில் நேரிலும், 04575 - 240021 என்ற எண்ணிலும் தொடா்பு கொள்ளலாம்.
