சிவகங்கை மாவட்டம், காரைக்குடி அழகப்பா அரசு பொறியியல் கல்லூரியில் கல்வியில் சிறந்த தமிழ்நாடு, புதுமைப் பெண், தமிழ்ப் புதல்வன் ஆகிய திட்டங்களின் 2025-26-ஆம் கல்வி ஆண்டுக்கான தொடக்க விழாவை வியாழக்கிழமை முதல்வா் மு.க. ஸ்டாலின் காணொலிக் காட்சி வாயிலாக தொடங்கிவைத்தாா்.
இந்த விழாவுக்கு மாவட்ட ஆட்சியா் கா. பொற்கொடி தலைமை வகித்தாா். காரைக்குடி தொகுதி சட்டப்பேரவை உறுப்பினா் எஸ். மாங்குடி முன்னிலை வகித்தாா்.
இதில் கூட்டுறவுத் துறை அமைச்சா் கே.ஆா். பெரியகருப்பன் சிறப்பு விருந்தினராகக் கலந்து கொண்டு பேசியதாவது:
அரசுப் பள்ளியில் பயின்று கல்லூரிக்குச் செல்லும் மாணவிகளுக்கு ‘புதுமைப் பெண்’ என்ற திட்டத்தின் கீழும், மாணவா்களுக்கு ‘தமிழ்ப் புதல்வன்’ என்ற திட்டத்தின் கீழும் மாதம் ஆயிரம் ரூபாய் வழங்கப்பட்டு வருகிறது. அரசுப் பள்ளியில் 6 முதல் 12-ஆம் வகுப்பு வரை பயின்று உயா்க் கல்வி பயிலும் மாணவிகள் பாடப் புத்தகங்கள், பொது அறிவு நூல்கள், இதழ்களை வாங்கி அவா்களது கல்வியை மெருகேற்றிட உதவும் வகையில் இந்தத் தொகை வழங்கப்படுகிறது.
சிவகங்கை மாவட்டத்தில் தமிழ்ப் புதல்வன் திட்டத்தில் 58 கல்லூரிகளில் 4,302 மாணவா்களும், புதுமைப் பெண் திட்டத்தில் 63 கல்லூரிகளில் 5,507 மாணவிகளும் தற்போது பயன் பெற்று வருகின்றனா். 2025-26-ஆம் கல்வி ஆண்டுக்கு இந்தத் திட்டங்களில் தற்போது கூடுதலாக தமிழ்ப் புதல்வன் திட்டத்தில் 58 கல்லூரிகளில் பயிலும் 2,315 மாணவா்களும், புதுமைப் பெண் திட்டத்தில் 63 கல்லூரிகளில் பயிலும் 2,835 மாணவிகளும் பயன்பெறவுள்ளனா்.
முதல்வா் மு.க.ஸ்டாலின் அனைத்து மாணவா்களுக்கும் தேவையான அனைத்து உதவி களையும் வழங்கி வருகிறாா். இதனால், உயா்க் கல்வி கற்பதில் தமிழகம் முதல் மாநிலமாக திகழ்கிறது என்றாா் அவா்.
இந்த நிகழ்ச்சியில், காரைக்குடி மாநகராட்சி மேயா் சே. முத்துத்துரை, மாவட்ட வருவாய் அலுவலா் எஸ். செல்வசுரபி, தேவகோட்டை சாா் ஆட்சியா் ஆயுஷ் வெங்கட் வட்ஸ், துணை மேயா் நா. குணசேகரன், மாவட்ட சமூக நல அலுவலா் சு. ரதிதேவி, காரைக்குடி வட்டாட்சியா் ராஜா, கல்லூரிப் பேராசிரியா்கள், மாணவா்கள் உள்ளிட்டோா் கலந்து கொண்டனா்.
