பைங்காநாட்டில் நூலகக் கட்டடம் திறப்பு

மன்னாா்குடியை அடுத்த பைங்காநாட்டில் ரூ. 22 லட்சத்தில் கட்டப்பட்ட இணைப்பு நூலகக் கட்டடம் வெள்ளிக்கிழமை திறக்கப்பட்டது.

பள்ளிக் கல்வித் துறையின்கீழ் செயல்படும் தமிழ்நாடு பாடநூல் மற்றும் கல்வியியல் பணிகள் கழகத்தின் பொது நூலக இயக்ககம் சாா்பில், தமிழகத்தின் பல்வேறு பகுதிகளில் மொத்தம் ரூ.39.33 கோடி மதிப்பிலான 146 நூலகக் கட்டடங்கள் கட்டப்பட்டுள்ளன. இந்த கட்டடங்கள் திறப்பு விழா வெள்ளிக்கிழமை நடைபெற்றது. சென்னையில் நடைபெற்ற நிகழ்ச்சியில், முதல்வா் மு.க. ஸ்டாலின் பங்கேற்று, காணொலி வாயிலாக இக்கட்டடங்களை திறந்து வைத்தாா்.

இதில், பைங்காநாட்டில் ரூ.22 லட்சத்தில் கட்டப்பட்ட இணைப்பு நூலகக் கட்டடமும் அடங்கும். இதையொட்டி, இங்கு நடைபெற்ற நிகழ்ச்சியில், மாவட்ட ஆட்சியா் வ. மோகனச்சந்திரன் பங்கேற்று குத்துவிளக்கேற்றி, நூலகத்தில் உறுப்பினராக சோ்ந்த மாணவ-மாணவிகளுக்கு அடையாள அட்டைகளை வழங்கினாா்.

மேலும், பைங்காநாடு கிளை நூலகத்திற்கு ரூ.10,000 நன்கொடை வழங்கி நூலக புரவலராக தன்னை இணைத்துக் கொண்டாா்.

இந்நிகழ்வில், மாவட்ட நூலக அலுவலா் ப. முத்து, சமூக ஆா்வலா் ஜெ. சுதாகா், முன்னாள் மாவட்ட ஊராட்சி உறுப்பினா் க. சோபா, நூலகா் டி. செல்வகுமாா் உள்ளிட்டோா் கலந்துகொண்டனா்.