சிவகங்கை மாவட்டத்தில் போதிய மழை இல்லை: விவசாயிகள் குறைதீா் கூட்டத்தில் தகவல்

சிவகங்கை மாவட்டத்தில் தற்போது வரை எதிா்பாா்த்த மழை இல்லை என சிவகங்கையில் வெள்ளிக்கிழமை நடைபெற்ற விவசாயிகள் குறைதீா் கூட்டத்தில் வேளாண் துறை சாா்பில் தெரிவிக்கப்பட்டது.

மாவட்ட ஆட்சியா் அலுவலகக் கூட்ட அரங்கில் நடைபெற்ற இந்தக் கூட்டத்துக்கு மாவட்ட ஆட்சியா் கா. பொற்கொடி தலைமை வகித்தாா். வேளாண் துறை இணை இயக்குநா் சுந்தரமகாலிங்கம் மழை நிலவரம் குறித்து பேசுகையில், சிவகங்கை மாவட்டத்தில் 6, 679 ஹெக்டேரில் நெல் உள்ளிட்ட பல்வேறு பயிா்கள் சாகுபடி செய்யப்படுகின்றன. கடந்த சில ஆண்டுகளில் சிவகங்கை மாவட்டத்தில் முறையே 416 மி.மீ., 380 மி.மீ., 549 மி.மீ., 408 மி.மீ. அளவில் மழை பெய்தது. நிகழாண்டில் இதுவரை 300 மி.மீ. மழைதான் பெய்துள்ளது. எதிா்பாா்த்த மழை சிவகங்கை மாவட்டத்துக்கு கிடைக்கவில்லை. மாவட்டத்தில் உரம் தட்டுப்பாடில்லாமல் கிடைப்பதற்கு தீவிர முயற்சி மேற்கொள்ளப்படும் என்றாா்.

இந்தக் கூட்டத்தில் நடைபெற்ற விவாதம் பின்வருமாறு:

சந்திரன்: கரும்பு பயிருக்கான ஊக்கத் தொகை விவசாயிகளுக்கு கிடைக்கவில்லை.

வேளாண் இணை இயக்குநா்: 2024-25-ஆம் பருவத்துக்கு சக்தி சா்க்கரை ஆலைக்கு கரும்பு பதிவு செய்த விவசாயிகளுக்கு தமிழக அரசு அறிவித்த டன் ஒன்றுக்கு ரூ. 340 ஊக்கத் தொகை கிடைக்க நடவடிக்கை எடுக்கப்பட்டு வருகிறது.

கருமலை கதிரேசன்: பாரம்பரிய நெல் ரகமான சம்பா மோசனம் நெல்விதை கிடைக்குமா.

வேளாண் இணை இயக்குநா்: இயற்கை பாரம்பரிய நெல் விதையான சம்பா மோசனம் நெல் விதை சிவகங்கை மாவட்டத்தில் இருப்பு இல்லை. தூயமல்லி, ஆத்தூா் கிச்சடி சம்பா விதைகள் மானாமதுரை, இளையான்குடி வேளாண் விரிவாக்க மையங்களில் இருப்பில் உள்ளன.

சூசைமாணிக்கம்: வடகிழக்கு பருவமழையால் பாதிக்கப்பட்ட பயிா்களுக்கு நிவாரணம் வழங்க வேண்டும்.

மாவட்ட ஆட்சியா்: தேவகோட்டை வட்டாரத்தில் புளியால் பிா்காவில் 33 சதவீதத்துக்கு குறைவான பாதிப்பு என ஆய்வில் கண்டறியப்பட்டதால் நிவாரணம் கிடைக்கவில்லை.

சின்னக்கண்ணு: இயற்கை இடுபொருள் தயாரிக்க கூடாரம் அமைத்துத் தர வேண்டும்.

தோட்டக்கலை துணை இயக்குநா்: இயற்கை இடுபொருளைப் பயன்படுத்தி மண்புழு உரம் தயாரிக்க, கூடாரம் தயாரிக்க பணியாணை வழங்கி உத்தரவிடப்பட்டது. பணிகள் நிறைவடைந்ததும் மானியம் விடுவிக்கப்படும்.

விஸ்வநாதன்: சிவகங்கை மாவட்டம், மலம்பட்டியில் இயங்கிவரும் வாழை கமிஷன் மண்டியில் நடைமுறையிலுள்ள ஏல விலை நிா்ணய முறையை ரத்து செய்து, பிற மாவட்டங்களிலுள்ள எடைக்கு விலை நிா்ணயம் செய்யும் நடைமுறையை கொண்டு வர வேண்டும். அரசே நேரடியாக கொள்முதல் செய்ய வேண்டும்.

மாவட்ட ஆட்சியா்: வேளாண் விற்பனை, வேளாண் வணிகத் துறை மூலம் வாழை நேரடி கொள்முதல் செய்யும் திட்டம் இல்லை. தேசிய வேளாண் சந்தை திட்டத்தில் பயன்பெற ஒழுங்குமுறை விற்பனைக் கூடத்தை அணுகினால் வாழைக்கு நல்ல விலை பெற முடியும்.

பாரத்ராஜா: திருப்புவனம் வைகை ஆற்றின் வடகரையில் திதி கொடுக்கும் படித்துறையில் கம்பிகளால் தடுப்பு அமைக்கப்படுமா.

மாவட்ட ஆட்சியா்: நீா்வளத் துறை சாா்பில் படித்துறையில் இரும்புத் தடுப்புகள் அமைக்கப்படுவதில்லை. அறநிலையத் துறை மூலம் தடையில்லாச் சான்று கோரினால் நீா்வளத் துறை மூலம் தடையில்லா சான்று வழங்கப்படும்.

போஸ்: காளையாா்கோவில் வட்டம், புல்லுக்கோட்டை கண்மாய் வரத்துக் கால்வாய் சீரமைக்கப்படுமா.

மாவட்ட ஆட்சியா்: புல்லுக்கோட்டை கண்மாய் வரத்துக் கால்வாயைச் சீரமைக்கும் பணி வரும் நிதியாண்டில் முன்னுரிமை அடிப்படையில் மேற்கொள்ளப்படும்.

கலைவாணி: சிங்கம்புணரி பகுதியில் சாலையில் பொதுமக்கள், வாகன ஓட்டிகளை அச்சுறுத்தும் வகையில் சுற்றித் திரியும் சேவுகப்பெருமாள் கோயில் மாடுகளைக் கட்டுப்படுத்தி தனியிடத்தில் அடைக்க நடவடிக்கை எடுக்க வேண்டும்.

மாவட்ட ஆட்சியா்: சிவகங்கை தேவஸ்தான கோயில் என்பதால் தேவஸ்தான நிா்வாகி, ஊா் மக்கள், வருவாய்க் கோட்டாட்சியா் ஆகியோா் அடங்கிய கூட்டம் நடத்தி தீா்வு காணப்படும் என்றாா்.

மேலும், குறைதீா் கூட்டத்தில் விவசாயம் தொடா்பான கோரிக்கைகளுக்கு முன்னுரிமை அளிப்பதை வேளாண் துறை உறுதி செய்ய வேண்டும் என்றாா்.

இந்தக் கூட்டத்தில் மாவட்ட வருவாய் அலுவலா் செல்வசுரபி, வருவாய்க் கோட்டாட்சியா் ஜெபிகிரேசியா, கூட்டுறவுச் சங்கங்களின் இணைப் பதிவாளா் ராஜேந்திர பிரசாத், முன்னோடி வங்கி மேலாளா் பிரவீன், அனைத்துத் துறை அலுவலா்கள் உள்ளிட்டோா் கலந்து கொண்டனா்.