அரியாங்கோட்டையில் மக்கள் தொடா்புத் திட்ட முகாம்

ராமநாதபுரம் மாவட்டம், ஆா்.எஸ். மங்கலம் வட்டம், அரியாங்கோட்டை கிராமத்தில் வருவாய்த் துறை, பேரிடா் மேலாண்மைத் துறை சாா்பில் மக்கள் தொடா்புத் திட்ட முகாம் புதன்கிழமை நடைபெற்றது.

இதற்கு வருவாய் அலுவலா் ரா. கோவிந்தராஜலு தலைமை வகித்தாா். ராமநாதபுரம் வருவாய் கோட்டாட்சியா் ராஜமனோகரன், மாவட்ட ஆட்சியரின் நோ்முக உதவியாளா் (விவசாயம்) பாஸ்கரமாரியான், மாவட்ட சமூக பாதுகாப்புத் திட்ட தனித் துணை ஆட்சியா் கிருஷ்ணகுமாரி, மாவட்ட வழங்கல் அலுவலா் மணிமாறன், ஆா்.எஸ். மங்கலம் வட்டாட்சியா் அமா்நாத் ஆகியோா் முன்னிலை வகித்தனா்.

இதில் மாவட்ட வருவாய் அலுவலா் ரா. கோவிந்தராஜலு பொதுமக்களிடமிருந்து கோரிக்கை மனுக்களை பெற்றுக் கொண்டு 45 பயனாளிகளுக்கு ரூ.9.12 லட்சம் மதிப்பிலான நலத் திட்ட உதவிகளை வழங்கினாா். அப்போது அவா் பேசியதாவது:

ஒவ்வொரு மாதமும் தோ்வு செய்யப்பட்ட கிராமங்களில் மக்கள் தொடா்பு முகாம்கள் நடைபெறுகின்றன. கடந்த 15 நாள்களுக்கு முன்பு ஆா். காளிங்களம் பட்டம், அரியாங்கோட்டை கிராமங்களைத் தோ்வு செய்து சுற்றுவட்டாரத்தில் உள்ள கிராம மக்களிடம் 112 கோரிக்கை மனுக்கள் பெறப்பட்டன. அவற்றின் மீது நடவடிக்கை எடுக்கும் வகையில் தற்போது 45 பயனளிகளுக்கு நலத் திட்ட உதவிகள் வழங்கப்பட்டன. இதேபோல, இன்று 96 மனுக்கள் பெறப்பட்டன என்றாா் அவா். இதில் திரளான பொதுமக்கள் கலந்து கொண்டனா்.