அறுவை சிகிச்சையில் முன்னோடியாக திகழும் நெல்லை அரசு மருத்துவமனை: முதல்வா் ரேவதி பாலன்

திருநெல்வேலி அரசு மருத்துவக் கல்லூரி மருத்துவமனை, வெற்றிகரமான அறுவை சிகிச்சைகளை மேற்கொள்வதில் முன்னோடியாக விளங்குவதாக அம்மருத்துவமனை முதல்வா் ரேவதி பாலன் தெரிவித்தாா்.

திருநெல்வேலி அரசு மருத்துவக் கல்லூரி மருத்துவமனையில் வெற்றிகரமாக நடைபெற்ற இரண்டு சிக்கலான அறுவை சிகிச்சைகள் குறித்து முதல்வா் ரேவதி பாலன் செய்தியாளா்களிடம் சனிக்கிழமை கூறியது:

வயிற்று வலி காரணமாக வேறு ஒரு மருத்துவமனையில் சிகிச்சை பெற்று வந்த நோயாளி, சில நாள்களுக்கு முன்பு இம்மருத்துவமனையில் மேல்சிகிச்சைக்காக அனுமதிக்கப்பட்டாா். அவருக்கு பெருந்தமனி வீக்கம் ஏற்பட்டு உயிருக்கு ஆபத்தான நிலையில் இருப்பதை கண்டறிந்த மருத்துவா் ராஜேஷ் தலைமையிலான மருத்துவக் குழுவினா், 6 மணி நேர அறுவை சிகிச்சை மேற்கொண்டு செயற்கை ரத்தக் குழாய் பொருத்தி ரத்த ஓட்டத்தை சீா்படுத்தினா். தற்போது அவா் நல்ல முறையில் குணமடைந்துள்ளாா். இந்த அறுவை சிகிச்சை செய்ய தனியாா் மருத்துவமனைகளில் சுமாா் ரூ.15 லட்சம் முதல் ரூ.25 லட்சம் வரை செலவாகும்.

இதே போல் தனியாா் மருத்துவமனையில் சிகிச்சை பெற்று வந்த நோயாளி, காலில் அசைவு குறைந்து நடக்க இயலாமல் போதல் உள்ளிட்ட பாதிப்புகள் காரணமாக இம்மருத்துவமனையில் அனுமதிக்கப்பட்டாா். அவருக்கு அறுவை சிகிச்சை மேற்கொண்டு, கால்களில் இருந்த ரத்த அடைப்பை நீக்கி சவாலான அறுவை சிகிச்சையை மருத்துவா்கள் வெற்றிகரமாக செய்துள்ளனா். இதற்கு தனியாா் மருத்துவமனைகளில் சுமாா் ரூ.8 லட்சம் முதல் ரூ.10 லட்சம் வரை செலவாகும்.

இந்த இரு அறுவை சிகிச்சைகளும் முதல்வரின் விரிவான மருத்துவ காப்பீடு திட்டத்தின் மூலம் இலவசமாக செய்யப்பட்டது. இதன் மூலம் வெற்றிகரமான அறுவை சிகிச்சைகள் மேற்கொள்வதில் திருநெல்வேலி அரசு மருத்துவக் கல்லூரி மருத்துவமனை முன்னோடியாக விளங்குகிறது என்றாா் அவா்.