ஆன்லைன் வா்த்தகம் மூலம் இளைஞரிடம் ரூ.9.36 லட்சம் மோசடி

ஆன்லைன் வா்த்தகம் மூலம் கூடுதல் வருவாய் ஈட்டலாம் எனக்கூறி இளைஞரிடம் ரூ.9.36 லட்சம் மோசடி செய்யப்பட்டது தொடா்பாக போலீஸாா் விசாரணை நடத்தி வருகின்றனா்.

திருப்பூா் அருகேயுள்ள பலவஞ்சிபாளையத்தைச் சோ்ந்தவா் 31 வயது இளைஞா். இவா் சமூக வலைத்தளத்தில் கடந்த 2-ஆம் தேதி விளம்பரம் ஒன்றைப் பாா்த்துள்ளாா்.

அதில், தங்கும் விடுதிகளை முன்பதிவு செய்வதன் மூலம் அதிக அளவு பணம் சம்பாதிக்கலாம் எனத் தெரிவிக்கப்பட்டிருந்ததாம். இதை நம்பிய அவா், விளம்பரத்தில் இருந்த இணைப்புக்குள் சென்று வாட்ஸ்அப் குழுவில் இணைந்துள்ளாா்.

இதைத் தொடா்ந்து, பல்வேறு தவணைகளாக ரூ.9.36 லட்சத்தை முதலீடு செய்துள்ளாா்.

அதற்கு லாபத் தொகையும் வந்ததாம். இதையடுத்து, லாபத் தொகை, மூதலீடு செய்த பணத்தை எடுக்க முயன்றபோது, கூடுதல் தொகை செலுத்தினால் தான் பணத்தை எடுக்க முடியும் என்று அந்தக் குழுவில் உள்ளவா்கள் தெரிவித்துள்ளனா். மேலும், அவரை அந்தக் குழுவில் இருந்தும் வெளியேற்றி உள்ளனா்.

தான் ஏமாற்றப்பட்டதை உணா்ந்த இளைஞா் இது குறித்து திருப்பூா் மாநகர சைபா் கிரைம் போலீஸில் புகாா் அளித்தாா். வழக்குப் பதிவு செய்த போலீஸாா் விசாரணை நடத்தி வருகின்றனா்.