ஆயுா்வேத ஸ்டாா்ட் அப்களுக்கு நிதியுதவி அளிக்க தில்லி அரசு திட்டம்: முதல்வா் ரேகா குப்தா தகவல்

தில்லி அரசு உலகளாவிய ஆயுா்வேத உச்சி மாநாட்டை நடத்தவும், பழங்கால இந்திய மருத்துவ முறையில் கவனம் செலுத்தும் ஸ்டாா்ட் அப்களுக்கு ஆதரவை வழங்கவும் திட்டமிட்டுள்ளது என்று முதல்வா் ரேகா குப்தா வியாழக்கிழமை தெரிவித்தாா்.

அகில இந்திய ஆயுா்வேத மாநாட்டில் கலந்து கொண்டு தில்லி முதல்வா் ரேகா குப்தா பேசியதாவது: ஆயுா்வேதம் உலக அளவில் பிரபலமடைந்து வருவதால், பிற நாடுகள் கூடுதல் தகவல்களுக்கும் ஆயுா்வேத மருந்துகளின் கிடைக்கும் தன்மைக்கும் இந்தியாவை எதிா்நோக்குகின்றன. ஆயுஷ் அமைச்சகத்தை அமைத்து, கொள்கைகளை வகுப்பதன் மூலம் ஆயுா்வேதம் மற்றும் பிற தொடா்புடைய மருத்துவ முறைகளுக்கு ஒரு பெரிய தளத்தை வழங்கியதற்காக பிரதமா் நரேந்திர மோடிக்கு நான் நன்றி கூறுகிறேன்.

அகில இந்திய மருத்துவ அறிவியல் நிறுவனத்தின் மாதிரியில் தில்லியில் அகில இந்திய ஆயுா்வேத நிறுவனத்தை அமைப்பது ஒரு பெரிய மைல்கல் ஆகும். அரசால் ஆதரிக்கப்படும் ஒரு உலகளாவிய ஆயுா்வேத உச்சி மாநாட்டை தில்லியில் ஏற்பாடு செய்ய வேண்டும். உலகெங்கிலும் உள்ள மக்கள் முன் ஆயுா்வேத முறையை நாம் முன்வைக்க முடியும். இதா்கு ஆயுா்வேதத் துறையில் உள்ள நிபுணா்கள் நடவடிக்கை எடுக்க வேண்டும். ஆயுா்வேத முறையுடன் தொடா்புடைய நிபுணா்கள் மற்றும் கல்வியாளா்கள் பாரம்பரிய மருத்துவ முறையில் புதிய முயற்சிகள் மற்றும் புதுமைகளைப் பற்றி விவாதிக்க இந்த உச்சிமாநாடு ஒரு வாய்ப்பை வழங்கும்.

ஆயுா்வேத அடிப்படையிலான தொடக்க நிறுவனங்களுக்கு நிதியுதவி அளிப்பது போன்ற பல்வேறு முயற்சிகளை தில்லி அரசு மேற்கொள்ள திட்டமிட்டுள்ளது. இளைஞா்கள் இந்தத் துறையில் பணியாற்ற ஊக்குவிப்பதற்கும், யோகா குருக்கள் மற்றும் நிபுணா்கள் புதுமைகளில் பணியாற்ற ஊக்குவிப்பதற்கும் திட்டமிடப்பட்டுள்ளது.

அனைத்து ஆயுா்வேத நூல்கள் மற்றும் அறிவை டிஜிட்டல் மயமாக்குவதற்கு பரிந்துரைக்கப்பட்டுள்ளது.

ஆயுா்வேத மருந்துகள் மக்களுக்கு வழங்கப்படும் 197 ஆயுஷ் மையங்களை தில்லி அரசு நடத்துகிறது. இவற்றில் 55 ஆயுா்வேதம், 25 யுனானி மற்றும் 117 ஹோமியோபதி மருந்தகங்கள் அடங்கும். மேலும், ஆயுா்வேத முறையைப் பின்பற்றும் மூன்று மருத்துவக் கல்லூரிகள் மற்றும் நான்கு மருத்துவமனைகள் உள்ளன. 2025-26 பட்ஜெட்டில், ஆயுஷுக்கு ரூ.100 கோடி உள்பட மாற்று மருத்துவ முறைகளை உருவாக்க தில்லி அரசு ரூ.275 கோடியை ஒதுக்கியுள்ளது என்றாா் முதல்வா் ரேகா குப்தா.

நிகழ்ச்சியின் போது செய்தியாளா்களிடம் பேசிய முதல்வா், ‘ஆயுா்வேதத்தை நாட்டில் உள்ள அனைவருக்கும் கிடைக்கச் செய்வதற்கும், உலகம் முழுவதும் அதைப் பிரபலப்படுத்துவதற்கும் மோடி பல நடவடிக்கைகளை எடுத்துள்ளது. ஆயுா்வேதம் குறித்த உலகளாவிய உச்சிமாநாட்டை நாங்கள் திட்டமிடுவோம். அலோபதி மருத்துவத்தால் சோா்வடைந்த மக்கள், நோய்களுக்கு முழுமையான சிகிச்சையை வழங்குவதால், ஆயுா்வேதத்திற்குத் திரும்பி வருகின்றனா். ஆயுா்வேதம், ஹோமியோபதி மற்றும் பிற மருத்துவ முறைகளை மக்களுக்கு அணுகக்கூடியதாக மாற்றுவது அரசின் பொறுப்பாகும்’ என்றாா்.