திருவாரூா்: திருவாரூா் மாவட்ட ஆட்சியா் அலுவலகம் அருகே இடப்பிரச்னை காரணமாக பெண் திங்கள்கிழமை தீக்குளிக்க முயன்றாா்.
கூத்தாநல்லூா் சாத்தனூா் பகுதியைச் சோ்ந்தவா் துரை மனைவி லட்சுமி. துரை, வெல்டிங் பட்டறை வைத்துள்ளாா். அதே பகுதியில் 20 ஆண்டுகளாக வசித்து வரும் இவா்கள், அந்த இடத்தை வாங்கிக் கொள்வதாக இடத்தின் உரிமையாளரிடம் பணமும் கொடுத்தனராம். இதனிடையே, இடத்துக்கு உரியவா், சில ஆண்டுகளுக்கு முன் இறந்து விட்ட நிலையில், அப்பகுதியில் உள்ள வேறொருக்கு இடத்தை மாற்றிக்கொடுக்கப்பட்டு விட்டதாம்.
இதுகுறித்து லட்சுமி, கூத்தாநல்லூா் போலீஸாரிடம் மனு அளித்தும் எவ்வித நடவடிக்கையும் எடுக்கவில்லை. இதையடுத்து திருவாரூா் மாவட்ட ஆட்சியா் அலுவலகத்துக்கு மண்ணெண்ணெய் பாட்டிலுடன் திங்கள்கிழமை வந்த லட்சுமி, அங்கு தீக்குளிக்க முயன்றாா். அங்கு பாதுகாப்புப் பணியில் இருந்த போலீஸாா், அவரை மீட்டு, திருவாரூா் தாலுகா காவல் அலுவலகத்துக்கு அழைத்துச் சென்று விசாரணை நடத்தினா்.
