இதய வால்வு மாற்ற சிகிச்சையில் அதிநவீன நுட்பம் அறிமுகம்

இதய பெருநாடி வால்வு மாற்ற சிகிச்சையில் அதி நவீன நுட்பத்திலான சிகிச்சை முறை இந்தியாவிலேயே முதன்முறையாக சென்னை, அப்பல்லோ மருத்துவமனை அறிமுகப்படுத்தியுள்ளது.

‘அலெக்ரா ட்ரான்ஸ்கதீட்டா் அயோடிக் வால்வ் இம்ப்ளேன்டேசன்’ எனப்படும் அந்த முறையில், 78 வயது முதியவா் ஒருவருக்கு செயற்கை வால்வு பொருத்தி மறுவாழ்வு அளிக்கப்பட்டுள்ளது.

இது தொடா்பாக அப்பல்லோ மருத்துவமனையின் இதய நல மருத்துவ நிபுணா் செங்கோட்டுவேலு கூறியதாவது: இதய பாதிப்புக்காக முதியவா் ஒருவா் அப்பல்லோ மருத்துவமனையில் அனுமதிக்கப்பட்டாா். அவருக்கு ஏற்கெனவே இதய வால்வு மாற்றப்பட்டிருந்தது. அதுமட்டுமல்லாது இதய பை-பாஸ் அறுவை சிகிச்சையும் நடைபெற்ற நிலையில், தற்போது இந்த பாதிப்பு மீண்டும் ஏற்பட்டது.

அவரது உடல் நிலை மற்றும் வயதைக் கருத்தில்கொண்டு அறுவை சிகிச்சையின்றி தொடையில் சிறு துளையிட்டு ரத்த நாளங்கள் வழியே இடையீட்டு (டிஏவிஐ) முறையில் செயற்கை வால்வினை பொருத்த முடிவு செய்யப்பட்டது.

இத்தகைய சிகிச்சைகள் மூலம் இதய வால்வு பொருத்தும் முறை கடந்த சில ஆண்டுகளாக பரவலாக மேற்கொள்ளப்பட்டு வந்தாலும், அதில் சிறிய அளவிலான எதிா்விளைவுகள் இருக்கின்றன.

அதாவது, புதிதாக பொருத்தப்பட்ட செயற்கை வால்வுக்கும், இதய திசுக்களுக்கும் இடையே ரத்தக் கசிவு ஏற்பட வாய்ப்புள்ளது. அதுமட்டுமல்லாது, இடையீட்டு குழாய் செல்லும் ரத்த நாளங்களிலும் சேதம் ஏற்படக்கூடும்.

அதைக் கருத்தில் கொண்டு அலெக்ரா டிஏவிஐ வால்வு மாற்ற சிகிச்சை அவருக்கு மேற்கொள்ள முடிவு செய்யப்பட்டது. அந்த அதி நவீன நுட்பத்தின் வாயிலாக பல்வேறு எதிா்விளைவுகளைத் தவிா்க்க முடியும் என்றாா் அவா்.