உடல் நலம் பேணுவதில் கவனம் செலுத்த வேண்டும்: மருத்துவா் ஷிவ் சாரின்

ஒருவா் சிறுவயது முதல் தனது உடல் நலம் பேணுவதில் கவனம் செலுத்த வேண்டும் என கல்லீரல் மருத்துவ நிபுணரான ஷிவ் சாரின் தெரிவித்தாா்.

உடல் நலம் குறித்து மருத்துவா் ஷிவ் சாரின் எழுதிய ‘வோன் யுவா் பாடி’ எனும் ஆங்கில நூல் வெளியீட்டு விழா சென்னை கீழ்பாக்கத்தில் உள்ள தேங் மருத்துவமனையில் சனிக்கிழமை நடைபெற்றது. இதில், சிறப்பு விருந்தினராகக் கலந்து கொண்ட நீதிபதி சுந்தா் மோகன் நூலை வெளியிட அரவிந்த கண்மருத்துவமனை திட்ட இயக்குநா் எஸ்.அரவிந்த் முதல் பிரதியை பெற்றுக்கொண்டாா்.

தொடா்ந்து உடல்நலம் மற்றும் மருத்துவம் குறித்து சென்னை ரேலா மருத்துவ மையத்தின் தலைமை நிா்வாக இயக்குனா் (சிஎம்டி) மருத்துவா் முகமது ரேலா மற்றும் மருத்துவா் ஷிவ் சாரின் ஆகியோா் கலந்துரையாடல் நடைபெற்றது.

அதில், அவா்கள் பேசியதாவது:

உடல்நலத்தை கட்டுப்படுத்துவதற்கான நடைமுறை வழிகாட்டல்களும், ஆரோக்கியமான வாழ்க்கையைத் தொடர உதவும் நிறைந்த தகவல்களும் நூலில் இடம்பெற்றுள்ளன. குறிப்பாக மருத்துவா் ஷிவ் சாரின் தனது மருத்துவ பயணத்தில் மேற்கொண்ட பல்வேறு சவால்களின் தொகுப்பாக இந்நூல் வெளியிடப்பட்டுள்ளது.

உடலின் ஒவ்வொரு உறுப்புகளின் பணிகளை அனைவரும் அறிந்திருக்க வேண்டியது கட்டாயம். பிறப்பு முதல் ஒருவா் தனது உடல் நலத்தில் கவனம் செலுத்துவதன் மூலம் முதுமை காலத்தில் நோய் பாதிப்பு ஏற்படுவதில் இருந்து தவிா்க்க முடியும். இதில் பெற்றோரின் பங்கு மிக முக்கியமானது.

ஆப்பரிக்க நாடுகளில் கல்லீரலுக்கு முக்கியத்துவம் கொடுப்பா். உடலின் முக்கிய உறுப்பாக கல்லீரல் கருதப்படுகிறது. மதுப்பழக்கத்தால் கல்லீரலில் அதிகப்படியான கொழுப்பு சேர வாய்ப்புள்ளது. இதுபோன்ற உடலின் ஒவ்வொரு உறுப்பை பாதுகாப்பதிலும் கவனம் செலுத்த வேண்டும்.

தங்களது ஆரோக்கியத்தை தாங்களே கையாள ‘வோன் யுவா் பாடி’ நூல் பயனுள்ளதாக இருக்கும் என்றனா்.

நிகழ்ச்சியில் திரைப்பட தயாரிப்பாளா் ஆா்.வி.உதயகுமாா், தேங் மருத்துவமனை இயக்குநா் எஸ்.வித்யாதரன், தலைவா்ஆா்.சிவகுமாா், உள்ளிட்டோா் கலந்து கொண்டனா்.