இலவச தையல் பயிற்சி: பெண்கள் விண்ணப்பிக்கலாம்

கிருஷ்ணகிரி அணை அருகே செயல்படும் இந்தியன் வங்கி சுய வேலைவாய்ப்பு பயிற்சி நிறுவனம் அளிக்கும் பெண்களுக்கான இலவச தையல் பயிற்சி வகுப்பில் சேர விண்ணப்பங்கள் வரவேற்கப்படுகின்றன.

இதுகுறித்து இந்தியன் வங்கி சுயவேலைவாய்ப்பு பயிற்சி நிறுவன இயக்குநா் வெங்கடேசன் ஞாயிற்றுக்கிழமை வெளியிட்ட செய்திக் குறிப்பு:

கிருஷ்ணகிரி அணை அருகே இந்தியன் வங்கி ஊரக சுய வேலைவாய்ப்பு பயிற்சி நிறுவனத்தில் வறுமைக்கோட்டிற்கு கீழ் வாழும் கிராமப்புற மகளிா், இளைஞா்களுக்கு தொழில் தொடங்க பல்வேறு இலவச பயிற்சிகள் வழங்கப்படுகிறது.

தற்போது பெண்களுக்கு 30 நாள்களுக்கு தையல் பயிற்சி இலவசமாக வழங்கப்படுகிறது. 8-ஆம் வகுப்பு படித்த 18 முதல் 45 வயது வரை உள்ள பெண்கள் மே 16-ஆம் தேதிக்குள் இப் பயிற்சி சேர கிருஷ்ணகிரி அணை பகுதியில் அமைந்துள்ள அலுவலகத்திற்கு நேரில் வந்து விண்ணப்பிக்கலாம்.

பயிற்சியின் போது, சீருடை, காலை, மதியம் உணவு, பயிற்சிக்கான உபகரணங்களும் இலவசமாக வழங்கப்படும். பயிற்சி வகுப்புகள் காலை 9.30 முதல் மாலை 5.30 மணி வரை நடைபெறும். பயிற்சியின் நிறைவில் சான்றிதழ் வழங்கப்படும்.

மேலும் விவரங்களுக்கு இயக்குநா், இந்தியன் வங்கி ஊரக சுயவேலைவாய்ப்பு பயிற்சி நிறுவனம், டிரைசெம் கட்டடம், கிருஷ்ணகிரி அணை, கிருஷ்ணகிரி என்ற முகவரியிலோ அல்லது 94422 47921, 90806 76557 என்ற எண்களிலோ தொடா்பு கொள்ளலாம் என அதில் தெரிவிக்கப்பட்டுள்ளது.