என்எல்சி துணை நிறுவனத்துடன், மகாராஷ்டிர எரிசக்தி தொழில்நுட்ப நிறுவனம் ஒப்பந்தம்

சிதம்பரம்: நெய்வேலி என்எல்சிஐஎல்-இன் துணை நிறுவனமான என்எல்சி இந்தியா புதுப்பிக்கத்தக்க ஆற்றல் நிறுவனம் (என்ஐஆா்எல்), மகாராஷ்டிரத்தின் மகாத்மா புலே புதுப்பிக்கத்தக்க எரிசக்தி மற்றும் உள்கட்டமைப்பு தொழில்நுட்ப நிறுவனத்துடன் கூட்டு நிறுவன ஒப்பந்தத்தில் கையொப்பமிட்டது.

இந்தியாவின் புதுப்பிக்கத்தக்க எரிசக்தி இலக்குகளை விரைவுபடுத்தும் முக்கிய நடவடிக்கையாக, என்எல்சி இந்தியா நிறுவனத்தின் முழுமையான துணை நிறுவனமான என்எல்சி இந்தியா ரினியூவபிள்ஸ் நிறுவனம் (என்ஐஆா்எல்), மகாத்மா புலே புதுப்பிக்கத்தக்க எரிசக்தி மற்றும் உள்கட்டமைப்பு தொழில்நுட்ப நிறுவனத்துடன் (மஹாபிரெய்ட்) இணைந்து மே 29-இல் மும்பையில் நடைபெற்ற நிகழ்ச்சியில் கூட்டு நிறுவன ஒப்பந்தத்தில் கையொப்பமிட்டது.

இந்திய அரசின் நிலக்கரித் துறைச் செயலா் விக்ரம்தேவ் தத், என்எல்சி இந்தியா நிறுவனத்தின் தலைவா் மற்றும் மேலாண் இயக்குநா் பிரசன்னகுமாா் மோட்டுபள்ளி, மஹாபிரெய்ட்-ன் மேலாண் இயக்குநா் பிபின் ஷிா்மாலி, செயல்பாட்டு இயக்குநா் விஜய்குமாா் கலாம் பாட்டீல், என்ஐஆா்எல் மற்றும் மஹாபிரெய்ட்-ன் மூத்த அதிகாரிகள் முன்னிலையில் இந்த ஒப்பந்தம் கையொப்பமானது.

இது, 16.04.2025 அன்று என்ஐஆா்எல் மற்றும் மஹாபிரெய்ட் இடையே கையொப்பமாகிய புரிந்துணா்வு ஒப்பந்தத்தின் தொடா்ச்சியான நடவடிக்கையாகும். முதல்கட்டமாக 500 மெகாவாட் மின் உற்பத்தி இந்த கூட்டு முயற்சி, மகாராஷ்டிர மாநிலத்தின் வளமிக்க புதுப்பிக்கத்தக்க எரிசக்தித் துறையில் என்ஐஆா்எல்-இன் மூலோபாய விரிவாக்கம் மற்றும் புதிய தொடக்கத்துக்கு ஒரு முக்கிய மைல்கல்லாக அமைகிறது.

இந்த ஒப்பந்தத்தின் மூலம் உருவாகும் கூட்டு நிறுவனம், சூரிய ஒளி மின்சாரம், காற்றாலை மின்சாரம், கலப்பின மின்சாரம், மிதக்கும் சூரிய ஒளி மின்சாரம், மின்கல ஆற்றல் சேமிப்பு (பேட்டரி) அமைப்புகள், நீரேற்று சேமிப்பு மற்றும் சூரிய சக்தி பூங்காக்கள் என மொத்தம் 2000 மெகாவாட் புதுப்பிக்கத்தக்க மின் உற்பத்தித் திட்டங்களை உருவாக்கும்.

முதல் கட்டமாக 500 மெகாவாட் மின் உற்பத்தித் திட்டங்களில் கவனம் செலுத்தி, பின்னா் மகாராஷ்டிராவில் மொத்தம் 5000 மெகாவாட் மின் உற்பத்தி வரை விரிவுபடுத்தப்படும். இந்த புதிய நிறுவனத்தில் என்ஐஆா்எல் 74% பங்குகளையும், மஹாபிரெய்ட் 26% பங்குகளையும் கொண்டிருக்கும்.