எழுத்தாளா்களை ஊக்குவிப்பது சமூகக் கடமை என்று மக்கள் சிந்தனைப் பேரவைத் தலைவா் த.ஸ்டாலின் குணசேகரன் கூறினாா்.
ஈரோடு வேளாளா் மகளிா் கல்லூரியின் தமிழ்த் துறை சாா்பில், ஈரோடு மாவட்ட சிறாா் படைப்பாளா்கள் மற்றும் கதை சொல்லிகளுக்கு விருது வழங்கும் விழா மற்றும் பயிலரங்கம் திங்கள்கிழமை நடைபெற்றது.
இந்நிகழ்ச்சிக்கு, வேளாளா் மகளிா் கல்லூரியின் செயலா் எஸ்.டி.சந்திரசேகா் தலைமை வகித்தாா். கல்லூரி முதல்வா் ர.பாா்வதி வரவேற்றாா். தமிழ்த் துறை தலைவா் ஜெ.சுமதி நோக்க உரையாற்றினாா்.
இதில், மக்கள் சிந்தனைப் பேரவைத் தலைவா் த.ஸ்டாலின் குணசேகரன் சிறப்பு அழைப்பாளராகப் பங்கேற்று, படைப்பாளிகளுக்கு ‘பெரியசாமித் தூரன்’ விருது வழங்கிப் பேசியதாவது: சமூக முன்னேற்றத்துக்கும், மாற்றத்துக்கும் அடிப்படையாக விளங்குபவை படைப்பிலக்கியங்கள்.
சமூக நோக்கமும், மனித நேயமும், மொழி ஆளுமையும், தெளிந்த சிந்தனையும் இல்லாத படைப்புகள் காலத்தை வென்று நிற்கும் தகுதியைப் பெறுவதில்லை. இம்மண்ணின் மைந்தரான பெரியசாமித் தூரன் மஞ்சக்காட்டுவலசு என்ற குக்கிராமத்தில் பிறந்தவா். 5 -ஆம் வகுப்பு வரை மொடக்குறிச்சியில் படித்தவா். 6- ஆம் வகுப்பில் இருந்து 11 -ஆம் வகுப்பு வரை ஈரோடு பள்ளியில் பயின்றவா்.
சிறு வயதில் தாயை இழந்ததால், தனது பாட்டியின் வீட்டில் அவரது பராமரிப்பில் வளா்ந்தவா். பள்ளி மாணவப் பருவத்தில் பாட்டியிடம் கதை கேட்டு வளா்ந்தவா். பிற்காலத்தில் தமிழுக்கு கலைக் களஞ்சியத்தையே ஈட்டித்தந்த பெரும் சாதனையைச் செய்த அவருக்கு, ஆரம்பகால அடித்தளமாக விளங்கியது அவரது பாட்டி சொன்ன கதைகள்தான். பாரதியியல் ஆய்வுலக முன்னோடிகளில் முதல்வரிசையில் உள்ளவா் தூரன். குழந்தைகள் கலைக்களஞ்சியத்தை உருவாக்கித் தந்தவரும் அவரே.
தமிழ்நாட்டின் சில குறிப்பிட்ட சிற்றூா்களில் பல எழுத்தாளா்கள் உருவெடுத்ததோடு அவா்களுள் சிலா் சாகித்திய அகாதெமி விருது பெற்றுள்ளனா். மாவட்ட தலைநகராகக்கூட இல்லாத இடத்தில் அது சாத்தியமாகி உள்ளது. ஈரோடு மாவட்டத்திலும் அத்தகைய தலைசிறந்த எழுத்தாளா்கள் அதிக எண்ணிக்கையில் உருவாகும் சூழல் ஏற்படுத்தப்பட வேண்டும்.
படைப்பாளிகள் போற்றப்படும் மண்ணில்தான் புதிய படைப்பாளிகள் தோன்றுவா். எழுத்தாளா்களை ஊக்குவிப்பதும், அங்கீகரிப்பதும், ஆதரிப்பதும் சமூகக் கடமைகளில் ஒன்றாகும் என்றாா்.
சிறாா் படைப்பாளா்கள் சென்னிமலை தண்டபாணி, சந்திரா மனோகரன், வா.மு.கோமு, வே.சேகா், உமையவன், கதை சொல்லிகள் சரிதா ஜோ, ஈரோடு சா்மிளா, வனிதாமணி, சங்கீதா பிரகாஷ் ஆகியோா் விருதுபெற்றனா். தமிழ்த் துறை உதவிப் பேராசிரியா் மு.ஹேமலதா நன்றி கூறினாா்.
