கடன் பிரச்னை காரணமாக வீட்டை பொக்லைன் இயந்திரம் மூலம் இடித்ததாக பெண் அளித்த புகாரின்பேரில், போலீஸாா் வழக்குப் பதிவு செய்து விசாரணை நடத்தி வருகின்றனா்.
திருப்பூா் வெள்ளியங்காடு பகுதியைச் சோ்ந்தவா் மகாமணி (58). இவா் பழனிசாமி என்பவரிடம் ரூ.13 லட்சம் வட்டிக்கு கடன் பெற்றுள்ளாா். மாதம் ரூ.22 ஆயிரம் வட்டி செலுத்தி வந்த நிலையில், கரோனா காலத்தில் வட்டி தர முடியாத காரணத்தால் பணம் பெற்ற்கு அத்தாட்சியாக பத்திரப் பதிவு அலுவலகத்தில் அடமான கடன் என சொல்லி நிலத்தை கிரையம் செய்ததாக கூறப்படுகிறது.
இந்நிலையில், கடந்த 6 மாதங்களுக்கு முன்பு வீட்டு வரி செலுத்த சென்றபோது வீடு மணிகண்டன் என்பவா் பெயரில் இருப்பதை அறிந்து மகாமணி அதிா்ச்சிடைந்துள்ளாா். இது தொடா்பாக பழனிசாமிடம் விசாரித்தபோது, தான் ஏமாற்றப்பட்டது தெரியவந்தது. இது தொடா்பாக நீதிமன்றத்தில் வழக்கு நடைபெற்று வந்த நிலையில், கடந்த சில வாரங்களாக பழனிசாமி தொடா்ந்து மிரட்டி வந்ததாக கூறப்படுகிறது.
இது குறித்து திருப்பூா் தெற்கு காவல் நிலையத்தில் மகாமணியின் மனைவி சாந்தி புகாா் அளித்தாா். இது தொடா்பாக விசாரணைக்கு வெள்ளிக்கிழமை இருதரப்பினரும் அழைக்கப்பட்ட நிலையில், சாந்தி மற்றும் அவரது உறவினா்கள் காவல் நிலையத்துக்கு சென்றுள்ளனா்.
இந்த நிலையில் பழனிசாமி தரப்பினா் நேரடியாக வீட்டுக்குச் சென்று வீட்டின் முன்புறத்தை பொக்லைன் இயந்திரம் மூலமாக இடித்துள்ளாா். மேலும் வீட்டுக்குள் நுழைந்த நபா்கள் உள்ளே இருந்த பொருள்களை சூறையாடி கழிவறை கதவுகளை இடித்துள்ளனா்.
இது தொடா்பாக திருப்பூா் தெற்கு காவல் நிலையத்தில் சாந்தி கொடுத்த புகாரின்பேரில் போலீஸாா் வழக்குப் பதிவு செய்த விசாரணை மேற்கொண்டு வருகின்றனா். வீட்டில் குழந்தைகள் உள்ளிட்டோா் இருந்த நிலையில் பொக்லைன் இயந்திரம் மூலம் வீட்டை இடித்து சூறையாடிய சம்பவம் அதிா்ச்சியை ஏற்படுத்தியுள்ளது.
