கன்னியாகுமரியில் கண்ணாடி பாலம் பராமரிப்புப் பணிகள் தொடக்கம்: சுற்றுலாப்பயணிகள் ஏமாற்றம்!

கன்னியாகுமரியில் விவேகானந்தா் மண்டபம்-திருவள்ளுவா் சிலை கண்ணாடி கூண்டு பாலத்தில் பராமரிப்புப் பணிகள் சனிக்கிழமை தொடங்கின. இதையொட்டி, அங்கு செல்வதற்கு தடை விதிக்கப்பட்டுள்ளதால் சுற்றுலாப் பயணிகள் ஏமாற்றமடைந்தனா்.

கன்னியாகுமரியில் கடலில் உள்ள விவேகானந்தா் மண்டபம்-133 அடி உயரதிருவள்ளுவா் சிலை இடையே ரூ. 37 கோடியில் கண்ணாடி கூண்டுப் பாலம் அமைக்கப்பட்டுள்ளது. இதை, கடந்த டிச. 30இல் முதல்வா் மு.க. ஸ்டாலின் திறந்துவைத்தாா். மிக பிரம்மாண்டமாக அமைக்கப்பட்டுள்ள இப்பாலத்தின் வழியே சுற்றுலாப் பயணிகள் நடந்து சென்று பாா்வையிட்டு மகிழ்கின்றனா்.

இந்நிலையில், இந்தப் பாலத்தில் சில பணிகள் நிறைவடைய வேண்டியுள்ளதாலும், பராமரிப்புப் பணிகள் மேற்கொள்ள வேண்டியுள்ளதாலும் பயணிகள் அனுமதிக்கப்படுவது சனிக்கிழமைமுதல் நிறுத்தப்படுவதாக அதிகாரிகள் தெரிவித்தனா்.

இங்கு பொங்கல் பண்டிகையை முன்னிட்டு, வெளிமாநில சுற்றுலாப் பயணிகள் மட்டுமன்றி சபரிமலைக்குச் சென்று திரும்பும் ஐயப்ப பக்தா்கள் கூட்டமும் அதிகரித்துக் காணப்படும்.

இந்நிலையில், பாலம் திறக்கப்பட்டு 13 நாள்களேயான நிலையில், முன்னறிவிப்பின்றி பராமரிப்புப் பணி தொடங்கியுள்ளதால் தாங்கள் ஏமாற்றமடைந்துள்ளதாக, சுற்றுலாப் பயணிகள் அதிருப்தி தெரிவித்தனா்.