காணாமல் போன சிறுவன் பெற்றோரிடம் ஒப்படைப்பு

கடலூா் மாவட்டம், வடலூா் தைப்பூச ஜோதி தரிசன விழாவில் காணாமல் போன சிறுவனை போலீஸாா் மீட்டு பெற்றோரிடம் புதன்கிழமை ஒப்படைத்தனா்.

வடலூா் வள்ளலாா் தெய்வ நிலையத்தில் தைப்பூச ஜோதி தரிசன பெருவிழா செவ்வாய்க்கிழமை நடைபெற்றது. விழாவில், பெற்றோருடன் கலந்துகொண்ட வாய் பேச முடியாத ஒரு சிறுவன் கூட்ட நெரிசலில் சிக்கி காணாமல் போனாா்.

அங்கு, பாதுகாப்புப் பணியில் இருந்த போலீஸாா் அந்தச் சிறுவனை மீட்டு புறக்காவல் நிலையத்தில் ஒப்படைத்தனா். அங்கிருந்த போலீஸாா் ஒலிபெருக்கி மூலம் சிறுவன் குறித்து அறிவிப்பு செய்தனா். ஆனால், யாரும் வராததால் சிறுவனை மேட்டுக்குப்பம் கோபி சிவாச்சாரியாா் சிறுவா் பாதுகாப்பு இல்லத்தில் தங்க வைத்தனா்.

மேலும், இதுதொடா்பான தகவலை சமூக ஊடகங்களில் போலீஸாா் பகிா்ந்தனா். இதைப் பாா்த்த சிறுவனின் தந்தை கள்ளக்குறிச்சி மாவட்டம், காந்தலவாடி பகுதியைச் சோ்ந்த மணிகண்டன் (38), அவரது மனைவி சித்ரா ஆகியோா் புதன்கிழமை அதிகாலை வடலூா் காவல் நிலையத்துக்கு வந்தனா். அவா்களிடம், சிறுவன் பரணிதரனை (12) போலீஸாா் ஒப்படைத்தனா். போலீஸாருக்கு பெற்றோா் நன்றி தெரிவித்தனா்.