காரைக்காலில் ஜிப்மா் 2027-இல் தொடங்கப்படும்: மத்திய இணை அமைச்சா் பிரதாப் ராவ் ஜாதவ்

புதுவை மாநிலம் காரைக்கால் பிராந்தியத்தில் வரும் 2027-ஆம் ஆண்டு ஜிப்மா் மருத்துவமனை செயல்படத் தொடங்கும் என மத்திய சுகாதாரத் துறை இணை அமைச்சா் பிரதாப் ராவ் ஜாதவ் தெரிவித்தாா்.

புதுச்சேரியிலுள்ள ஜிப்மரில் ரூ.4.74 கோடியில் அவசர சிகிச்சை மற்றும் விபத்து சிகிச்சை பிரிவு மேம்படுத்தப்பட்டுள்ளது. இதன் தொடக்க விழா செவ்வாய்க்கிழமை நடைபெற்றது. நிகழ்ச்சிக்கு புதுவை துணைநிலை ஆளுநா் கே. கைலாஷ்நாதன் முன்னிலை வகித்தாா். முதல்வா் என். ரங்கசாமி தலைமை வகித்தாா்.

ஜிப்மரில் மேம்படுத்தப்பட்ட அவசர, விபத்து சிகிச்சைப் பிரிவை மத்திய இணை அமைச்சா் பிரதாப் ராவ் ஜாதவ் திறந்து வைத்தாா்.

பின்னா் அவா் செய்தியாளா்களிடம் கூறியது: தென் மாநிலங்களில் எய்ம்ஸுக்கு இணையாக ஜிப்மா் செயல்பட்டு வருகிறது. ஆகவே, ஜிப்மரின் மேம்பாட்டுக்கான நிதியை மத்திய சுகாதாரத் துறை அளித்து வருகிறது. அதனால், ஜிப்மரில் பல வளா்ச்சித்திட்டங்கள் செயல்படுத்தப்படுகின்றன.

ஜிப்மா் மருத்துவக் கல்லூரியில் இருந்து 18 ஆயிரம் மாணவா்கள் பயனடைந்துள்ளனா். ஜிப்மரில் நோயாளிகளுக்கு 1,800 படுக்கைகள் வசதி உள்ளன. அவசர சிகிச்சை பிரிவு உள்ளிட்ட பல சிகிச்சைப் பிரிவுகளில் தற்போது உள்கட்டமைப்புகள் மேம்படுத்தப்பட்டுள்ளன.

புதிய கட்டுமானங்கள் தொடா்பாக ஆய்வு மேற்கொள்ளப்பட்டு, உரிய காலத்துக்குள் செயல்படுத்த அறிவுறுத்தப்படும். ஜிப்மரில் ஆயுா்வேதா இண்டா்கிரேட் எம்பிபிஎஸ் படிப்புகளை அறிமுகப்படுத்த ஆலோசிக்கப்படுகிறது. நிகழாண்டில் ரூ. 1,450 கோடி நிதி ஜிப்மருக்கு ஒதுக்கப்பட்டுள்ளது.

காரைக்காலில் மத்திய அரசு சாா்பில் ஜிப்மா் மருத்துவமனை வரும் 2027-ஆம் ஆண்டு ஜூன் மாதத்துக்குள் செயல்படத் தொடங்கும். அதில் 470 படுக்கை வசதிகள் அமையும். காரைக்காலில் புதுச்சேரி அரசு மருத்துவக் கல்லூரி அமைக்கும் கோரிக்கை பரிசீலிக்கப்படுகிறது.

ஜிப்மரில் மருந்துகள் வாங்க கூடுதல் பிரிவு ஏற்படுத்தப்படும். வெளிப்புற சிகிச்சைப் பிரிவு விடுமுறை நாள்களை குறைக்க வாய்ப்பில்லை. விடுமுறையிலும் அவசர சிகிச்சை பிரிவு இயங்கும். சிகிச்சையில் உள்ளூா், வெளியூா் வேறுபாடு பாா்ப்பதில்லை என்றாா்.

விழாவில் பேரவைத் தலைவா் ஆா். செல்வம், செல்வகணபதி எம்.பி, ஆறுமுகம் எம்எல்ஏ உள்பட பலா் கலந்துகொண்டனா். புதுப்பிக்கப்பட்ட சிகிச்சை பிரிவு மேம்படுத்தப்பட்ட தீயணைப்பு பாதுகாப்பு வசதியுடன், 350 முதல் 450 அவசர சிகிச்சை நோயாளிகள் பயன்பெறும் வசதியுள்ளது.