குஜராத்தை வெளியேற்றியது மும்பை

ஐபிஎல் போட்டியின் ‘எலிமினேட்டா்’ ஆட்டத்தில் மும்பை இண்டியன்ஸ் 20 ரன்கள் வித்தியாசத்தில் குஜராத் டைட்டன்ஸை வெள்ளிக்கிழமை வீழ்த்தியது.

இந்த வெற்றியின் மூலமாக குஜராத்தை வெளியேற்றிய மும்பை, இறுதி ஆட்ட வாய்ப்புக்காக ‘குவாலிஃபயா் 2’-வில் பஞ்சாப் கிங்ஸை சந்திக்கிறது.

முன்னதாக இந்த ஆட்டத்தில் முதலில் மும்பை 20 ஓவா்களில் 5 விக்கெட்டுகள் இழப்புக்கு 228 ரன்கள் சோ்க்க, குஜராத் 20 ஓவா்களில் 6 விக்கெட்டுகள் இழப்புக்கு 208 ரன்களே எடுத்தது.

டாஸ் வென்ற மும்பை, பேட்டிங்கை தோ்வு செய்ய, இன்னிங்ஸை தொடங்கிய ரோஹித் சா்மா - ஜானி போ்ஸ்டோ கூட்டணி, முதல் விக்கெட்டுக்கு 84 ரன்கள் சோ்த்து வலுவான அடித்தளம் அமைத்தது.

இதில் போ்ஸ்டோ, 22 பந்துகளில் 4 பவுண்டரிகள், 3 சிக்ஸா்களுடன் 47 ரன்களுக்கு ஆட்டமிழந்தாா். தொடா்ந்து சூா்யகுமாா் யாதவ் களம் புக, அவருடனான ரோஹித்தின் 2-ஆவது விக்கெட் பாா்ட்னா்ஷிப் 59 ரன்கள் சோ்த்தது.

இந்நிலையில் சூா்யகுமாா், 1 பவுண்டரி, 3 சிக்ஸா்களுடன் 33 ரன்களுக்கு பெவிலியன் திரும்பினாா். 4-ஆவது பேட்டராக திலக் வா்மா வர, அதுவரை ஸ்கோருக்கு முக்கியமாக பங்களித்த ரோஹித் சா்மா வீழ்ந்தாா்.

50 பந்துகளில் 9 பவுண்டரிகள், 4 சிக்ஸா்களுடன் 81 ரன்கள் சோ்த்து, பிரசித் கிருஷ்ணா வீசிய 17-ஆவது ஓவரில் விக்கெட்டை இழந்தாா். பின்னா் கேப்டன் ஹா்திக் பாண்டியா வந்தாா். மறுபுறம் திலக் வா்மா 3 சிக்ஸா்களுடன் 25 ரன்களுக்கு முடித்துக் கொண்டாா்.

6-ஆவது பேட்டா் நமன் திா் 9 ரன்களுக்கு சாய்க்கப்பட, ஓவா்கள் முடிவில் பாண்டியா 9 பந்துகளில் 3 சிக்ஸா்களுடன் 22, மிட்செல் சேன்ட்னா் 0 ரன்களுடன் ஆட்டமிழக்காமல் இருந்தனா். குஜராத் தரப்பில் சாய் கிஷோா், பிரசித் கிருஷ்ணா ஆகியோா் தலா 2, முகமது சிராஜ் 1 விக்கெட் கைப்பற்றினா்.

அடுத்து 229 ரன்களை நோக்கி விளையாடிய குஜராத் அணியில், கேப்டன் ஷுப்மன் கில் 1 ரன்னுக்கு வெளியேற, சாய் சுதா்சன் அதிரடி காட்டினாா். குசல் மெண்டிஸுடனான அவரின் கூட்டணிக்கு 64 ரன்கள் கிடைத்தது.

இதில் மெண்டிஸ் 1 பவுண்டரி, 2 சிக்ஸா்களுடன் 20 ரன்களுக்கு ஆட்டமிழக்க, வாஷிங்டன் சுந்தா் வந்தாா். சுதா்சன் - சுந்தா் ஜோடி 84 ரன்கள் சோ்த்து அசத்தியது. சுந்தா் 24 பந்துகளில் 5 பவுண்டரிகள், 3 சிக்ஸா்களுடன் 48, சுதா்சன் 49 பந்துகளில் 10 பவுண்டரிகள், 1 சிக்ஸருடன் 80 ரன்களுக்கு விடைபெற்றனா்.

பின்னா் வந்தோரில் ஷொ்ஃபேன் ரூதா்ஃபோா்டு 4 பவுண்டரிகளுடன் 24, ஷாருக் கான் 1 சிக்ஸருடன் 13 ரன்களுக்கு பெவிலியன் திரும்பினா்.

ஓவா்கள் முடிவில் ராகுல் தெவாதியா 1 பவுண்டரி, 1 சிக்ஸருடன் 16, ரஷீத் கான் 0 ரன்களுடன் ஆட்டமிழக்காமல் இருந்தனா். மும்பை பௌலிங்கில் டிரென்ட் போல்ட் 2, ஜஸ்பிரீத் பும்ரா, ரிச்சா்ட் கிளீசன், மிட்சென் சேன்ட்னா், அஸ்வனி குமாா் ஆகியோா் தலா 1 விக்கெட் எடுத்தனா்.