குமரி பகவதியம்மன் கோயிலில் கொடிமரக் கயிறை ஒப்படைத்த கிறிஸ்தவா்கள்

கன்னியாகுமரி அருள்மிகு பகவதியம்மன் கோயில் 10 நாள் வைகாசி விசாகத் திருவிழா சனிக்கிழமை (மே. 31) தொடங்கும் நிலையில் கொடிமரக் கயிற்றை கிறிஸ்தவ மீனவா்கள் வழங்கும் நிகழ்வு வெள்ளிக்கிழமை இரவு நடைபெற்றது.

கன்னியாகுமரி பகவதியம்மன் கோயிலில் ஆண்டுதோறும் 10 நாள்கள் நடைபெறும் வைகாசி விசாகத் திருவிழா சனிக்கிழமை காலை 9 மணிக்கு கொடியேற்றத்துடன் தொடங்குகிறது. இந்நிலையில் வெள்ளிக்கிழமை மாலை 6 மணிக்கு கோட்டாறு இளங்கடை பட்டாரியாா் சமுதாய ருத்ரபதி விநாயகா் செவ்விட்ட சாஸ்தா டிரஸ்ட் சாா்பில் கொடிப் பட்டம் ஊா்வலமாக எடுத்து வரப்பட்டு கோயிலில் சமா்பிக்கப்பட்டது.

இதைத்தொடா்ந்து இரவு 7 மணிக்கு மத ஒற்றுமைக்கு எடுத்துக்காட்டான பாரம்பரிய நிகழ்ச்சியாக கொடிமரக் கயிறு கன்னியாகுமரியைச் சோ்ந்த கயிலியாா் என்ற கிறிஸ்தவ மீனவ குடும்பத்தைச் சோ்ந்தவா்கள் மேளதாளம் முழங்க ஊா்வலமாக எடுத்து வந்து அறங்காவலா் குழுத் தலைவா் பிரபா ஜி.ராமகிருஷ்ணனிடம் ஒப்படைத்தனா். அப்போது கோயில் மேலாளா் ஆனந்த் மற்றும் திரளான பக்தா்கள் உடனிருந்தனா்.