கும்பகோணத்தில் வாய்க்கால் பராமரிப்பில் சிக்கல்! ஒப்படைக்கும் மாநகராட்சி பெற மறுக்கும் நீா்வளத்துறை!

கும்பகோணம் மாநகர எல்லைக்குள் நீா்வளத்துறைக்கு சொந்தமான நான்கு பாசன வாய்க்கால்கள் செல்கின்றன. கடந்த 2015 -இல் நகராட்சி நிா்வாக நலன் கருதி எங்களுக்கு தாருங்கள் என்று பெற்றுக்கொண்டு தற்போது 2025- இல் எங்களுக்கு வேண்டாம் நீா்வளத்துறையினரிடம் திரும்ப ஒப்படைக்கிறோம் என்று கூறும் மாநகராட்சியிடம் கொடுத்த வாய்க்கால்களை திரும்ப பெறமாட்டோம் என்று கூறுவதால் இரண்டு துறைகளுக்கிடையே மோதல் நிலவிவருகிறது.

நான்கு வாய்க்கால்கள் -தஞ்சாவூா் மாவட்டம், கும்பகோணத்தில் நீா்வள ஆதாரத்துறையின் கட்டுப்பாட்டில் நகர எல்லைக்குள் காவிரி ஆற்றிலிருந்து பிரியும் பழவத்தான் கட்டளை வாய்க்கால், பெருமாண்டி வாய்க்கால், உள்ளூா் வாய்க்கால் மற்றும் தேப்பெருமாநல்லூா் வாய்க்கால்கள் செல்கின்றன. முன்பு நிலங்களுக்கு பாசனம் செய்ய தண்ணீா் கொண்டு செல்லும் வாய்க்கால்களாக இருந்தவை. தற்போது இந்த விளைநிலங்கள் வீட்டடி மனைகளாக மாறிவிட்டது. வணிக நிறுவனங்கள், தொழிற்சாலைகள் அமைந்துள்ள இடமாக உள்ளது. இந்த நிலையில் பாசன நிலங்கள் மக்கள் வசிப்பிடமாக மாறிவிட்டதால் நான்கு வாய்க்கால்களில் தற்போது பாசன தண்ணீருக்கு பதில் கழிவு நீா்தான் செல்கிறது. மேலும் வாய்க்கால்களின் கரைகளை ஆக்கிரமிக்கப்பட்டது. குடியிருப்புகளின் கழிவு நீா் வடியச்செய்வதால் கொசுக்கள் உற்பத்தியாகும் இடமாக, டெங்கு, மலேரியா உள்ளிட்ட தொற்று நோய்கள் பரவும் சுகாதார கேடான இடமாக மாறியது வாய்க்கால்கள்.

இந்த நான்கு வாய்க்கால்களில் ஏற்படும் சுகாதார கேடுகள் ஏற்படுவதை தடுக்க நகராட்சி நிா்வாகமே வாய்க்கால்களை தூா்வாரி, ஆக்கிரமிப்புகளை அகற்றி, கொசு உள்ளிட்டவைகள் ஏற்படாமல் சுத்தமாக பராமரித்து கொள்கிறோம் என்று கூறி கடந்த 2007- இல் கும்பகோணம் நகராட்சி நிா்வாகம், நீா்வளத்துறைக்கு கடிதம் எழுதியது. கடிதத்தை பரிசீலனை செய்த நீா்வளத்துறை கடந்த 29.10.2015 ஆம் ஆண்டு நான்கு வாய்க்கால்களை நகராட்சியிடம் ஒப்படைப்பாதாக அரசாணை வெளியிட்டது. நிபந்தனைகள் - வாய்க்கால்களை பெறும் நகராட்சிக்கு நீா்வளத்துறையினா் விதித்த நிபந்தனைகளாக வாய்க்கால்களை நாகராட்சி மூலம் பராமரிப்பு பணிகள் மட்டும் செய்ய வேண்டும் எந்தவித உரிமையும் கோருதல் கூடாது. ஆக்கிரமிப்புகள் ஏற்படாமல் பாா்த்துக்கொள்ள வேண்டும். பாலங்கள் மற்றும் நிரந்தர மற்றும் தற்காலிக புதிய கட்டுமானங்கள் ஏதும் வாய்க்கால்கள் மீது நகராட்சியால் கட்டுதல் கூடாது.

நீள அகலம், சாய்வு மட்டம் குறையக்கூடாது. நகராட்சி வேண்டுகோளுக்காகத்தான் ஒப்படைக்கப்படுகிறதே தவிர நிதி பற்றாக்குறை என வரும் காலங்களில் திரும்ப ஒப்படைக்க கூடாது உள்ளிட்ட பல்வேறு நிபந்தனைகள் விதிக்கப்பட்டது. நகராட்சியும் நிபந்தனைகளை ஏற்றுக்கொண்டு பராமரிப்பு பணிகளை தொடங்கியது. நகராட்சி வசம் வந்ததால் நான்கு கால்வாய்களிலும் பல ஆக்கிரமிப்புகள், சேதம், கழிவுநீா் தேங்குதல், சுகாதார கேடுகள் ஏற்பட்டது. இடியப்ப சிக்கல் போல் நான்கு வாய்க்கால் செல்லும் பாதைகளில் ஆக்கரமிப்புகள் அதிகம் ஏற்பட்டது. இந்த நிலையில் நகராட்சியாக இருந்த கும்பகோணம் 2021-இல் மாநகராட்சியாக தரம் உயா்த்தப்பட்டது.

உயா்நீதிமன்ற உத்தரவு - இந்த நிலையில் சமூக ஆா்வலா் யானை ராஜேந்திரன் என்பவா் கும்பகோணம் பகுதியில் நீா்நிலைகளில் ஆக்கிரமிப்புகளை அகற்ற மதுரை உயா்நீதி மன்ற உத்தரவு மீது மாநகராட்சி அதிகாரிகள் நடவடிக்கை எடுக்கவில்லை என்று வழக்கு தொடர உயா்நீதிமன்றம் ஆட்சியா், ஆணையருக்கு கண்டனம் தெரிவித்து குறிப்பிட்ட நாள்களுக்குள் அகற்ற வேண்டும் என உத்தரவிட்டது. அதன்பிறகும் மாநகராட்சி மெதுவாக இயங்கியதால் உயா்நீதி மன்றம் கும்பகோணம் மாநகர ஆணையா் லட்சுமணன் மீது ஒழுங்கு நடவடிக்கை எடுத்து, இடமாற்றமும் செய்தது. அதன்பிறகு சுதாரித்துக்கொண்ட மாநகராட்சி நிா்வாகம், நான்கு வாய்க்கால்களை பராமரிப்பதில் இடியாப்ப சிக்கல் ஏற்படும் என்று முடிவு செய்தது. கடந்த சில மாதங்களுக்கு முன்பு நடைபெற்ற மாநகா் மன்ற கூட்டத்தில் நான்கு வாய்க்கால்களையும் நீா்வளத்துறையிடமே ஒப்படைக்க தீா்மானம் நிறைவேற்றி அனுப்பினா். தற்போது வரை நீா்வளத்துறையினா் மாநகராட்சிக்கு எவ்வித பதிலும் அனுப்பவில்லை.

இதுகுறித்து நீா்வளத்துறை உதவிப்பொறியாளா் வெங்கடேசனிடம் கேட்டபோது, நீா்வளத்துறை கடந்த 2015 -இல் அன்று கும்பகோணம் நகராட்சி நிா்வாகத்திடம் நான்கு வாய்க்கால்களை ஒப்படைக்கும் போது விதித்த நிபந்தனைகளின் படி திரும்ப பெற முடியாது என்றாா். இந்த முடிவு தற்போதைய கும்பகோணம் மாநகராட்சிக்கு பெரும் தலைவலியாக உள்ளது, காரணம் ஒருபுறம் உயா்நீதிமன்ற தீா்ப்பை அமல்படுத்துவதில் நெருக்கடி, மறுபுறம் ஆக்கிரமிப்பாளா்களான பொதுமக்களின் துன்பநிலை, நீா்வளத்துறை 4 வாய்க்கால்களை திரும்பபெற மறுத்து மோதலை ஏற்படுத்தும் நிலை. இதுபோன்ற சூழ்நிலையில் நல்ல முடிவை மாநகராட்சி நிா்வாகம் எடுக்குமா என்று பொதுமக்கள் எதிா்பாா்க்கின்றனா்.