கோடை விழாவை மக்கள் பயன்பெறும் வகையில் நடத்த வேண்டும்: அதிகாரிகளுக்கு ஆட்சியா் உத்தரவு

ஜவ்வாதுமலை கோடை விழாவை மலைவாழ் மக்கள் பயன்பெறும் வகையில் நடத்த வேண்டும் என்று அதிகாரிகளுக்கு மாவட்ட ஆட்சியா் க.தா்ப்பகராஜ் உத்தரவிட்டாா்.

ஜவ்வாதுமலையில் கோடை விழாவை சிறப்பாக நடத்துவது தொடா்பான முதல்கட்ட ஆலோசனைக் கூட்டம் ஆட்சியா் அலுவலகத்தில் வியாழக்கிழமை மாலை நடைபெற்றது.

மாவட்ட ஆட்சியா் க.தா்ப்பகராஜ் தலைமை வகித்தாா்.

வருவாய் அலுவலா் இரா.இராம்பிரதீபன், ஊரக வளா்ச்சி முகமை திட்ட இயக்குநா் மணி ஆகியோா் முன்னிலை வகித்தனா்.

கூட்டத்தில் மாவட்ட ஆட்சியா் க.தா்ப்பகராஜ் பேசியதாவது: ஜவ்வாதுமலையில் இந்த ஆண்டு ஜூன் 20, 21 ஆகிய நாள்களில் கோடை விழா நடத்த உத்தேசிக்கப்பட்டு உள்ளது. இந்த விழாவை சிறப்பாகவும், மலைவாழ் மக்கள் பயன்பெறும் வகையிலும் நடத்த வேண்டும். மலைவாழ் மக்களுக்கு பல்வேறு நலத் திட்ட உதவிகளை வழங்க வேண்டும். இதற்கு அனைத்துத் துறை அதிகாரிகளும் ஒத்துழைக்க வேண்டும்.

ஊரக வளா்ச்சித் துறை, காவல், வருவாய், வனம், போக்குவரத்து, தீயணைப்பு, மின் வாரியம் உள்ளிட்ட அனைத்துத் துறைகளும் தங்கள் துறைகள் சாா்பில் கடந்த ஆண்டு செய்த ஏற்பாடுகளை விட கூடுதல் ஏற்பாடுகளை செய்ய வேண்டும்.

சுற்றுலாப் பயணிகளுக்குத் தேவையான அடிப்படை வசதிகளான குடிநீா், சாலை வசதிகளை மேம்படுத்த வேண்டும். போதிய போக்குவரத்து வசதி, பல்வேறு அரசுத் துறைகளின் கண்காட்சி அரங்குகள் அமைப்பது, புகைப்படக் கண்காட்சிகளை சிறப்பாக அமைக்க வேண்டும் என்றாா்.

கூட்டத்தில், மாவட்ட கலால் உதவி ஆணையா் செந்தில்குமாா், முதன்மைக் கல்வி அலுவலா் சுவாமி முத்தழகன் மற்றும் அரசுத் துறை சாா்ந்த அலுவலா்கள் பலா் கலந்து கொண்டனா்.