கோழிக்கடை மேலாளரை தாக்கி ரூ. 25 ஆயிரத்தை கொள்ளையடித்த வடமாநில இளைஞா்கள்

மேட்டூா்: மேட்டூா் அருகே கோழிக்கடை மேலாளரை தாக்கி ரூ. 25,000 கொள்ளையடித்துச் சென்ற வடமாநில இளைஞா்களை சென்னையில் போலீஸாா் கைது செய்தனா்.

சேலம் மாவட்டம், மேட்டூா் அருகே உள்ள ஜலகண்டாபுரம், காட்டம்பட்டி பகுதியில் உள்ள கோழிக்கடை மற்றும் உணவகத்தில் எம்.செட்டிப்பட்டியைச் சோ்ந்த பாா்த்திபன் (45) மேலாளராக பணியாற்றி வருகிறாா். இக்கடையில் பிகாா் மாநிலத்தைச் சோ்ந்த இளைஞா்கள் சுமீா்குமாா் (20), முகேஷ் (25) ஆகியோா் வேலைசெய்து வந்தனா்.

இந்நிலையில், ஞாயிற்றுக்கிழமை இரவு சுமீா்குமாா் மற்றும் முகேஷ் இருவரும் இரும்புக் கம்பியால் மேலாளா் பாா்த்திபனை தாக்கி கடையில் இருந்த ரூ. 25 ஆயிரத்தை கொள்ளையடித்து தப்பிச்சென்றனா்.

பாா்த்திபனின் அலறல் சப்தம்கேட்டு வந்த அக்கம்பக்கத்தினா், ஜலகண்டாபுரம் காவல் நிலையத்துக்கு தகவல் தெரிவித்தனா். சம்பவ இடத்துக்கு வந்த போலீஸாா் பாா்த்திபனை மீட்டு ஈரோடு தனியாா் மருத்துவமனைக்கு அனுப்பிவைத்து சுமீா்குமாா், முகேஷ் ஆகியோரை தேடிவந்தனா்.

இந்நிலையில், இவா்கள் இருவரும் சேலத்தில் இருந்து ரயில் மூலம் சென்னைக்கு சென்றது தெரியவந்தது. இதுகுறித்து சென்னை போலீஸாருக்கு தகவல் தெரிவிக்கப்பட்டதன் பேரில், சென்னை சென்ட்ரல் ரயில் நிலையத்தில் சமீா்குமாா், முகேஷ் இருவரையும் போலீஸாா் திங்கள்கிழமை அதிகாலை கைதுசெய்தனா்.