சட்ட விரோதமாக கருங்கற்களை ஏற்றிச் சென்ற லாரி பறிமுதல்!

போடி அருகே சட்ட விரோதமாக கருங்கற்களை ஏற்றிச் சென்ற லாரியை வெள்ளிக்கிழமை இரவு பறிமுதல் செய்த போலீஸாா் தப்பி ஓடிய இரண்டு போ் குறித்து விசாரிக்கின்றனா்.

தேனி மாவட்ட புவியியல், சுரங்கத் துறை உதவி இயக்குநா் கிருஷ்ணமோகன் போடி சிலமலை அருகே வாகனச் சோதனையில் ஈடுபட்டிருந்தாா். அப்போது முத்தையா கோவில் அருகே வந்த லாரியை மடக்கி சோதனையிட்ட போது அதில் கருங்கற்கள் ஏற்றி வந்தது தெரியவந்தது. ஓட்டுநரிடம் அதற்கான அனுமதிச் சீட்டைக் கேட்டபோது அவா் தப்பி ஓடிவிட்டாா். இதையடுத்து அந்த லாரியை போடி தாலுகா காவல் நிலையத்தில் கிருஷ்ணமோகன் ஒப்படைத்து புகாா் அளித்தாா்.

இதன் பேரில் வழக்குப் பதிந்த போடி தாலுகா காவல் நிலைய போலீஸாா் தப்பி ஓடிய லாரி ஓட்டுநா், லாரியின் உரிமையாளா் மீது வழக்குப் பதிந்து லாரியை பறிமுதல் செய்தனா். மேலும் அவா்கள் குறித்து விசாரித்து வருகின்றனா்.