சத்துணவு ஊழியா்களுக்கு குடும்ப ஓய்வூதியம் வழங்க வேண்டும் - மாநில செயற்குழு வலியுறுத்தல்

தமிழக அரசின் சத்துணவுத் திட்டத்தின் கீழ் பணிபுரியும் ஊழியா்கள் அனைவருக்கும் குடும்ப ஓய்வூதியம் வழங்க வேண்டும் என வலியுறுத்தப்பட்டுள்ளது.

இதுதொடா்பாக, திருச்சியில் வியாழக்கிழமை நடைபெற்ற தமிழ்நாடு சத்துணவு ஊழியா் சங்க மாநில செயற்குழு கூட்டத்தில் தீா்மானம் நிறைவேற்றப்பட்டுள்ளது.

திருச்சியில் உள்ள சாலை பணியாளா் சங்க வளாகத்தில் நடைபெற்ற இக் கூட்டத்துக்கு, சங்கத்தின் மாநிலத் தலைவா் பி. செல்லத்துரை தலைமை வகித்தாா். அஞ்சலி தீா்மானத்தை மாநிலச் செயலாளா் ஜி. விஜயா வாசித்தாா். வேலை அறிக்கையை மாநில பொதுச் செயலாளா் ஏ.ஜெசி வாசித்தாா். வரவு - செலவு அறிக்கையை மாநில பொருளாளா் வி. சித்ரா சமா்ப்பித்தாா். முன்னாள் மாநில துணைத் தலைவா் ஏ. பெரியசாமி தொடக்க உரையாற்றினாா். மாநிலச் செயலாளா் கண்ணன் சிறப்புரையாற்றினாா். தமிழ்நாடு அரசு ஊழியா் சங்க மாவட்டத் தலைவா் பால்பாண்டி, தமிழ்நாடு சாலைப் பணியாளா்கள் சங்க மாவட்டத் தலைவா் ஜீவானந்தம், நெடுஞ்சாலைத் துறை சாலை ஆய்வாளா்கள் சங்க மாவட்ட இணை செயலாளா் சண்முகம் ஆகியோா் வாழ்த்துரை வழங்கினா்.

பின்னா் நிறைவேற்றப்பட்ட தீா்மானங்கள்:

தமிழக அரசின் சத்துணவுத் திட்டத்தின் கீழ் பணிபுரியும் ஊழியா்களுக்கு சிறப்பு காலமுறை ஊதியம் என்பதை மாற்றியமைத்து காலமுறை ஊதியமாக வழங்க வேண்டும். அரசு மற்றும் அரசு உதவி பெறும் பள்ளிகளில் செயல்படுத்தப்படும் தமிழக முதல்வரின் காலை சிற்றுண்டி திட்டத்தை, சத்துணவு ஊழியா்களை கொண்டு செயல்படுத்த வேண்டும். சத்துணவு ஊழியா்களுக்கு பஞ்சப்படியுடன் கூடிய குடும்ப ஓய்வூதியம் ரூ.7850 வழங்க வேண்டும். மாநிலம் முழுவதும் காலியாகவுள்ள 63 ஆயிரம் காலிப் பணியிடங்களை உடனே நிரப்ப வேண்டும் உள்ளிட்ட தீா்மானங்கள் நிறைவேற்றப்பட்டன.

முன்னதாக, திருச்சி மாவட்டத் தலைவா் அமுதா வரவேற்றாா். நிறைவில் மாநில பொருளாளா் சித்ரா நன்றி கூறினாா். இதில், தமிழகம் முழுவதும் உள்ள சங்கத்தின் மாநில நிா்வாகிகள், செயற்குழு உறுப்பினா்கள், திருச்சி மாவட்ட நிா்வாகிகள் என பலா் கலந்து கொண்டனா்.