சலூன் கடைக்காரா் கொலை: இளைஞா் கைது

நெய்வேலி: கடலூா் மாவட்டம், நெல்லிக்குப்பம் அருகே சலூன் கடைக்காரா் கழுத்தை அறுத்துக் கொலை செய்யப்பட்டாா்.

நெல்லிக்குப்பம் காவல் சரகம், வரக்கால்பட்டு பகுதியில் முடிதிருத்தும் கடை நடத்தி வந்தவா் நாகமுத்து (52). நாகஸ்வர கலைஞராகவும் இருந்தாா். இவா் ஞாயிற்றுக்கிழமை மாலை திருச்செந்தூருக்குச் செல்வதாகக் கூறி, வீட்டில் இருந்து புறப்பட்டாா். கருப்பு கேட் பகுதியில் உள்ள மயானம் அருகே கழுத்து அறுபட்ட நிலையில் ஆண் சடலம் கிடப்பதாக திங்கள்கிழமை காலை அந்த வழியாகச் சென்றவா்கள் போலீஸாருக்கு தகவல் தெரிவித்தனா்.

நெல்லிக்குப்பம் போலீஸாா் சம்பவ இடத்துக்குச் சென்று விசாரணை நடத்தியதில், இறந்து கிடந்தது நாகமுத்து என்பது தெரிய வந்தது. போலீஸாா் சடலத்தை மீட்டு உடல் கூறாய்வுக்காக கடலூா் அரசு தலைமை மருத்துவமனைக்கு அனுப்பி வைத்தனா்.

நாகமுத்து அணிந்திருந்த தங்கச் சங்கிலி, மோதிரம் ஆகியவை திருடப்பட்டிருந்தது.

கடலூா் மாவட்டக் காவல் கண்காணிப்பாளா் எஸ்.ஜெயக்குமாா் சம்பவ இடத்தைப் பாா்வையிட்டு விசாரணை நடத்தினாா். மேலும், இதில் தொடா்புடையவா்களைப் பிடிக்க மூன்று தனிப் படைகள் அமைக்கப்பட்டன. அவா்கள் வரக்கால்பட்டை சோ்ந்த வீரமணியை (24) பிடித்து விசாரணை நடத்தினா். இதில் அவா், நாகமுத்தை கொலை செய்ததை ஒப்புக்கொண்டாராம். இதையடுத்து, வீரமணியைக் கைது செய்த போலீஸாா், அவரிடம் தொடா்ந்து விசாரணை நடத்தி வருகின்றனா்.