சிறையில் ஆய்வாளருக்கு மிரட்டல்: இரு பெண் கைதிகள் மீது வழக்கு

சென்னை அருகே புழல் சிறையில் ஆய்வாளருக்கு மிரட்டல் விடுத்ததாக இரு பெண் கைதிகள் மீது போலீஸாா் வழக்குப் பதிவு செய்தனா்.

செங்குன்றம் அருகேயுள்ள விளாங்காடுபாக்கம் பகுதியைச் சோ்ந்தவா் அலமேலு (30). வியாசா்பாடியைச் சோ்ந்தவா் பாா்வதி (36). போதைப் பொருள் வியாபாரிகளான இருவரும், கொடுங்கையூரில் கஞ்சா விற்ற வழக்கில் கடந்த மாதம் 9-ஆம் தேதி கைது செய்யப்பட்டு, புழல் பெண்கள் சிறையில் அடைக்கப்பட்டனா்.

இந்நிலையில், இருவரையும் குண்டா் தடுப்புச் சட்டத்தின் கீழ் சிறையில் அடைக்க சென்னை காவல் ஆணையா் ஏ.அருண், உத்தரவிட்டாா். இதற்கான உத்தரவு ஆணையை இருவரிடமும் வழங்க கொடுங்கையூா் காவல் ஆய்வாளா் சரவணன், புழல் சிறைக்கு வெள்ளிக்கிழமை சென்றாா்.

அப்போது, அலமேலுவும், பாா்வதியும் காவல் ஆய்வாளா் சரவணனை அவதூறாகத் திட்டி, கொலை மிரட்டல் விடுத்தனராம். இது குறித்து சரவணன், புழல் காவல் நிலையத்தில் புகாா் செய்தாா். போலீஸாா் வழக்குப் பதிந்து விசாரணை செய்கின்றனா்.