சிவகங்கையில் வருகிற 17 -ஆம் தேதி நடைபெறும் அரசு, அரசு சாரா நிகழ்வுகளில் பங்கேற்பதற்காக துணை முதல்வா் உதயநிதி ஸ்டாலின் சிவகங்கைக்கு வர இருப்பதாக கூட்டுறவுத் துறை அமைச்சா் கே.ஆா். பெரியகருப்பன் தெரிவித்தாா்.
இதுகுறித்து அவா் வெளியிட்ட செய்திக் குறிப்பு: தமிழக முதல்வா் மு.க.ஸ்டாலின் தலைமையிலான அரசு அனைத்து தரப்பு மக்களுக்கும் பல்வேறு நலத்திட்ட உதவிகளைச் செய்து வருகிறது.
இதில் சிறப்புத் திட்ட செயலாக்கத் துறையை வைத்துள்ள துணை முதல்வா் உதயநிதி ஸ்டாலின் ஒவ்வொரு மாவட்டமாகச் சென்று அரசின் திட்டப் பணிகள் செயல்படும் விதம், அவற்றின் முன்னேற்றம் குறித்து நேரில் ஆய்வு செய்து, பொதுமக்களிடம் குறைகளைக் கேட்டு, நலத்திட்ட உதவிகளை வழங்கி வருகிறாா்.
இதன் தொடா்ச்சியாக வருகிற 17-ஆம் தேதி (செவ்வாய்க்கிழமை) மதுரையிலிருந்து காா் முலம் வரும் துணை முதல்வருக்கு திருப்புவனத்தில் மாவட்ட திமுக சாா்பில் காலை 9.30 மணிக்கு சிறப்பான வரவேற்பு அளிக்கப்படும். காலை 10 மணியளவில் காணூரில் ரூ. 40 கோடியில் கட்டப்பட்டு வரும் தடுப்பணை திட்டப் பணியை அவா் பாா்வையிடுவாா்.
காலை 10.30 மணியளவில் சிவகங்கை முதல் நகா்மன்றத் தலைவரும் மூத்த முன்னோடியுமான சொ.லெ. சாத்தையாவை அவரது இல்லத்தில் சந்தித்து நலம் விசாரிப்பாா். காலை 11 மணிக்கு சிவகங்கை அருகே சோழபுரத்தில் மகாத்மா காந்தி தேசிய ஊரக வேலைவாய்ப்பு உறுதி அளிப்பு திட்டப் பணிகளை பாா்வையிடுவாா்.
முற்பகல் 11.30 மணி அளவில் மாவட்ட ஆட்சியா் அலுவலகத்தில் ஆட்சியா் ஆஷா அஜித் தலைமையில் அரசின் திட்டப்பணிகளின் முன்னேற்றம் குறித்து ஆய்வு மேற்கொள்வாா்.
தொடா்ந்து, பகல் 12 மணியளவில் சிவகங்கை மாவட்ட ஆட்சியா் அலுவலக வளாகத்தில் அமைந்துள்ள திடலில் முடிவடைந்த திட்டப் பணிகளை திறந்து வைத்து, புதிய திட்டங்களுக்கு அடிக்கல் நாட்டுவாா்.
அந்த மேடையில் 500 -க்கும் மேற்பட்டவா்களூக்கு பல்வேறு அரசு துறைகளில் சாா்பில், நலத்திட்ட உதவிகளை வழங்கி விழா பேருரை ஆற்றுவாா். மாலை 4 மணி அளவில் திருப்பத்தூரில், அனைத்து நிா்வாகிகள், துணை அமைப்பாளா்களை சந்திப்பாா். மாலை 6.45 அளவில் மதுரைக்கு புறப்பட்டுச் செல்கிறாா். மதுரையிலிருந்து விமானம் மூலம் சென்னை செல்கிறாா் என்றாா் அவா்.
