சீன எல்லைப் பிரச்னையில் நியாயமான தீா்வை இந்தியா ஏற்கும்: மக்களவையில் ஜெய்சங்கா் தகவல்

புது தில்லி: சீனாவுடனான எல்லைப் பிரச்னையை முடிவுக்குக் கொண்டு வருவதில் நியாயமான, இரு தரப்பும் ஏற்றும் கொள்ளும் தீா்வை இந்தியா ஏற்கும் என்றும் மக்களவையில் வெளியுறவுத் துறை அமைச்சா் எஸ்.ஜெய்சங்கா் தெரிவித்தாா்.

கடந்த 2020-ஆம் ஆண்டு இந்திய-சீன எல்லையில் கல்வான் பள்ளத்தாக்கில் இரு நாட்டு ராணுவ வீரா்கள் இடையே மோதல் மற்றும் உயிரிழப்புகள் ஏற்பட்டதால் எல்லையில் பதற்றம் ஏற்பட்டது. இரு நாடுகளும் படைகள் மற்றும் கனரக தளவாடங்களைக் குவித்தன. இரு நாட்டு உறவும் பின்னடைவைச் சந்தித்தது.

அதன் பிறகு இரு நாடுகள் இடையிலான பல சுற்று பேச்சுவாா்த்தைகளால், கடந்த அக்டோபரில் கிழக்கு லடாக் எல்லையில் பிரச்னைக்குரிய டெம்சோக் மற்றும் டெப்சாங் சமவெளி பகுதிகளில் இருந்து படைகளை விலக்கிக் கொள்ளும் நடவடிக்கையை இந்தியாவும் சீனாவும் தொடங்கின. முன்னதாக, 2021-இல் பாங்காங் ஏரியின் வடக்கு, தெற்கு பகுதி, 2022-இல் கோக்ரா வெப்ப நீருற்று பகுதியில் இரு நாட்டு படைகளும் விலக்கிக் கொள்ளப்பட்டன.

இந்நிலையில், மக்களவையில் செவ்வாய்க்கிழமை சீனாவுடனான எல்லைப் பிரச்னை குறித்து வெளியுறவு அமைச்சா் ஜெய்சங்கா் பேசியதாவது:

2020-ஆம் ஆண்டு கிழக்கு லடாக்கில் இரு நாட்டு ராணுவத்தினா் இடையே ஏற்பட்ட மோதலுக்குப் பிறகு, எல்லையின் பல்வேறு பகுதிகளில் படைக் குவிப்பு நிகழ்ந்தது. ஆனால், தொடா்ந்து நடைபெற்ற பேச்சுவாா்த்தைக்குப் பிறகு பல்வேறு கட்டங்களாக படைகளை இரு நாடுகளும் விலக்கி வருகின்றன. அண்மைக்காலமாக நடைபெற்ற பேச்சுவாா்த்தையில் நல்ல முன்னேற்றம் ஏற்பட்டுள்ளது.

சீனாவுடனான எல்லைப் பிரச்னையை முடிவுக்குக் கொண்டு வருவதில் நியாயமான, இரு தரப்பும் ஏற்றும் கொள்ளும் தீா்வை இந்தியா ஏற்கும்.

எல்லையில் அமைதியையும், ஸ்திரத்தன்மையையும் உறுதி செய்யாமல் இரு நாடுகள் இடையே நல்லுறவு மேம்படாது. இந்தியா அமைதியை விரும்பும் நாடாகவே உள்ளது. எல்லையில் போக்குவரத்தை மேற்கொள்வதில் பல்வேறு சிக்கல்கள் இருந்தபோதும், பிரச்னை நேரிட்டபோது நமது ராணுவம் சிறப்பாக செயல்பட்டது என்று ஜெய்சங்கா் பாராட்டினாா்.

எல்லையில் ரோந்துப் பணி மற்றும் முழுமையான படை விலக்கல் தொடா்பாக இரு நாடுகளுக்கும் இடையே அக்டோபரில் முக்கிய ஒப்பந்தம் கையொப்பமானது. இதன்மூலம், ரோந்துப் பணி மற்றும் படை விலக்கல் விவகாரங்களில் கடந்த 2020-ஆம் ஆண்டுக்கு முந்தைய சூழலே மீண்டும் தொடர வழிவகை ஏற்பட்டது. எல்லையில் 4 ஆண்டுகளுக்கும் மேலாக நீடித்துவரும் பிரச்னைக்கு தீா்வுகாண்பதில் பெரும் முன்னேற்றமாக இந்த ஒப்பந்தம் கருதப்படுகிறது.