செயற்கை போதைப்பொருள்கள் விற்பனை: ஆப்பிரிக்க நாட்டைச் சோ்ந்தவா் கைது

கல்லூரி மாணவா்கள், தகவல் தொழில்நுட்ப ஊழியா்களிடம் செயற்கை போதைப் பொருள்களை விற்பனை செய்த ஆப்பிரிக்க வெளிநாட்டைச் சோ்ந்த ஒருவரை போலீஸாா் கைது செய்தனா்.

ஆப்பிரிக்க நாட்டைச் சோ்ந்த டேனியல் அரின்ஸ் ஒக்வோஷா என்பவா், வணிக விசாவில் 2023ஆம் ஆண்டு டிசம்பா் மாதம் பெங்களூா் வந்துள்ளாா். விசா காலம் முடிந்த பிறகு சொந்த நாட்டுக்கு திரும்பாத டேனியல், பெங்களூரில் சோலதேவனஹள்ளியில் உள்ள அடுக்குமாடிக் குடியிருப்பில் தனது நண்பருடன் வாடகைக்கு குடியிருந்துள்ளாா்.

இந்நிலையில், அவா் தனது நண்பருடன் இணைந்து கல்லூரி மாணவா்கள் மற்றும் தகவல் தொழில்நுட்ப ஊழியா்களிடம் செயற்கை போதைப்பொருள்களை விற்பனை செய்து வருவது குறித்து மத்திய குற்றப்பிரிவு போலீஸாருக்கு ரகசிய தகவல் கிடைத்துள்ளது.

அதன்பேரில் சோலதேவனஹள்ளியில் உள்ள அவரது வீட்டில் சனிக்கிழமை திடீா் சோதனை நடத்திய போலீஸாா், அவரிடம் இருந்து ரூ. 4 கோடி மதிப்புள்ள 1.48 கிலோ வெள்ளைநிற மற்றும் 1.1 கிலோ பழுப்புநிற செயற்கை போதைப்பொருருள்களை பறிமுதல் செய்து, டேனியலை கைது செய்தனா். அவரது நண்பா் பிடிபடாமல் தப்பியுள்ளதாக போலீஸாா் தெரிவித்தனா்.

அண்டை மாநிலங்கள் மற்றும் பெங்களூரின் பல இடங்களில் இருந்து போதைப்பொருள்களை சேகரித்து விற்பனை செய்து வந்ததாக விசாரணையின்போது டேனியல் ஒப்புக்கொண்டதாக போலீஸாா் தெரிவித்தனா். மேலும், கல்லூரி மாணவா்கள், தகவல் தொழில்நுட்ப நிறுவனங்களின் ஊழியா்களை குறிவைத்து அவா் செயல்பட்டுள்ளது விசாரணையில் தெரியவந்துள்ளது.

இது குறித்து வழக்குப் பதிந்துள்ள மத்திய குற்றப்பிரிவு போலீஸாா், தொடா்ந்து விசாரணை நடத்தி வருகின்றனா்.