பாகிஸ்தான் - வங்கதேசம் டி20 தொடர்: 5 போட்டிகள் அல்ல; 3 போட்டிகளாக குறைப்பு!

பாகிஸ்தான் மற்றும் வங்கதேசம் அணிகளுக்கு இடையிலான டி20 தொடரின் போட்டிகள் குறைக்கப்பட்டுள்ளன.

வங்கதேச அணி பாகிஸ்தானில் சுற்றுப்பயணம் மேற்கொண்டு மே 25 முதல் ஜூன் 3 வரையிலான இடைவெளியில் 5 போட்டிகள் கொண்ட டி20 தொடரில் விளையாடுவதாக இருந்தது. தற்போது, இரு அணிகளுக்கும் இடையிலான இந்த டி20 தொடர் 3 போட்டிகள் கொண்ட தொடராக மாற்றப்பட்டுள்ளது.

இதையும் படிக்க: ஐபிஎல் பிளே ஆஃப் போட்டிகள் நடைபெறும் இடங்கள் அறிவிப்பு; இறுதிப்போட்டி எங்கே?

பாகிஸ்தான் மற்றும் வங்கதேச கிரிக்கெட் வாரியங்கள் ஒன்றாக இணைந்து டி20 தொடரின் அட்டவணையில் மாற்றம் செய்துள்ளன. தொடரின் மூன்று போட்டிகளையும் லாகூரிலுள்ள கடாஃபி திடலில் நடத்த திட்டமிடப்பட்டுள்ளது. இருப்பினும், போட்டிகள் நடைபெறும் தேதிகள் இன்னும் அறிவிக்கப்படவில்லை.

இந்தியா - பாகிஸ்தான் இடையேயான பதற்றம் காரணமாக பாகிஸ்தான் சூப்பர் லீக் தொடரில் மாற்றம் மேற்கொள்ளப்பட்டது. அந்த தொடரின் இறுதிப்போட்டி வருகிற மே 25 ஆம் தேதி நடைபெறவுள்ளதால், பாகிஸ்தான் - வங்கதேசத்துக்கு இடையிலான டி20 தொடருக்கான அட்டவணையில் மாற்றம் மேற்கொள்ளப்பட்டுள்ளது.

வங்கதேசம் தற்போது ஐக்கிய அரபு அமீரகத்துக்கு எதிராக 3 போட்டிகள் கொண்ட டி20 தொடரில் விளையாடி வருவது குறிப்பிடத்தக்கது.