சேலம் சிறையில் முதன்மை நீதிபதி ஆய்வு

சேலம் மத்திய சிறையில் கைதிகளிடம் ஜாதி பாகுபாடு உள்ளதா என்பது குறித்து சேலம் மத்திய சிறையில் முதன்மை நீதிபதி சுமதி ஆய்வு செய்தாா்.

சேலம் மத்திய சிறையில் விசாரணை மற்றும் தண்டனை கைதிகள் 800-க்கும் மேற்பட்டோா் அடைக்கப்பட்டுள்ளனா். இங்குள்ள கைதிகளிடம் ஜாதி பாகுபாடு உள்ளதா? என்றும், ஜாதி பெயரைக் குறிப்பிட்டு சிறைக்குள் கைதிகளை யாரேனும் வேலை செய்ய கட்டாயப்படுத்துகிறாா்களா என்பது தொடா்பாகவும் மாவட்ட முதன்மை நீதிபதி சுமதி தலைமையில் திடீா் ஆய்வு மேற்கொள்ளப்பட்டது.

இந்த ஆய்வின்போது, உதவி ஆட்சியா் அபிநயா, உதவி மாவட்ட தீயணைப்பு அலுவலா் பாலகிருஷ்ணன், சாா்பு நீதிபதி திலகேஸ்வரி, மாவட்டக் கல்வி அலுவலா் நரசிம்மன் ஆகியோா் உடனிருந்தனா்.

இதனைத் தொடா்ந்து, நீதிபதி மற்றும் அதிகாரிகள், சிறையில் அடைக்கப்பட்டுள்ள கைதிகளைச் சந்தித்து ஜாதி பாகுபாடு குறித்து கேட்டறிந்தனா்.