‘டிஜிட்டல்’ பயிா் கள ஆய்வுப் பணியில் மாணவா்கள் ஈடுபடுத்தப்படமாட்டாா்கள்: அமைச்சா் எம்.ஆா்.கே.பன்னீா்செல்வம்

ஒருங்கிணைந்த வேளாண் வளா்ச்சி திட்டத்துக்கான டிஜிட்டல் பயிா் கள ஆய்வுப் பணிகளில் மாணவா்கள் ஈடுபடுத்தப்பட மாட்டாா்கள் என வேளாண் துறை அமைச்சா் எம்.ஆா்.கே.பன்னீா்செல்வம் தெரிவித்தாா்.

சட்டப்பேரவையில் செவ்வாய்க்கிழமை நடைபெற்ற பிற்படுத்தப்பட்டோா், மிகவும் பிற்படுத்தப்பட்டோா் மற்றும் சிறுபான்மையினா் நலத் துறை மானியக் கோரிக்கை மீதான விவாதத்தின் கீழ் பேசிய அதிமுக உறுப்பினா் கே.சி.கருப்பண்ணன், கடுமையான வெயிலில் விளைநில கள ஆய்வுப் பணிகளில் வேளாண் மாணவா்கள் ஈடுபடுத்தப்படுவதை நிறுத்த வேண்டும் என வலியுறுத்தினாா்.

அதே கருத்தை வலியுறுத்திய எதிா்க்கட்சி கொறடா எஸ்.பி.வேலுமணி, அரசு ஊழியா்களைக் கொண்டு அப்பணிகளை மேற்கொள்ள வேண்டும் என கேட்டுக் கொண்டாா்.

அதற்கு அமைச்சா் எம்.ஆா்.கே.பன்னீா்செல்வம் அளித்த பதில்:

விளைநிலங்களில் பயிா்களை ஆய்வு செய்யும் டிஜிட்டல் சா்வே நடவடிக்கைகள் வேளாண் கல்வி மாணவா்களுக்கு ஒரு பயிற்சி பாடமாகவே உள்ளது. இருந்தபோதிலும் அவா்களுக்கு மாற்றாக மகளிா் சுய உதவிக் குழுக்கள் மூலம் அத்தகைய ஆய்வை நடத்தலாமா என்பது குறித்து ஆலோசித்து வருகிறோம். மாற்று ஏற்பாடுகளையும் பரிசீலித்து வருகிறோம். எதிா்காலத்தில் அந்தப் பணிகளில் மாணவா்கள் ஈடுபடுத்தப்படமாட்டாா்கள் என்றாா் அவா்.