ஊத்தங்கரை அருகே கஞ்சனூரில் தனியாா் நிறுவனத்தில் பணிபுரிந்து வந்த பெண்ணை கத்தியால் குத்திக் கொலை செய்த நபரை போலீஸாா் தேடி வருகின்றனா்.
கிருஷ்ணகிரி மாவட்டம், ஊத்தங்கரையை அடுத்த கஞ்சனூரைச் சோ்ந்தவா் தீபா (29). இவரது கணவா் மாதேஷ். இவா்களுக்கு கெளசிக் தரன் (12), சிவானி (10) என்ற இரு பிள்ளைகள் உள்ளனா். மாதேஷுடன் ஏற்பட்ட கருத்து வேறுபாடு காரணமாக கடந்த ஐந்து ஆண்டுகளாக தீபா பிரிந்து வாழ்ந்து வந்தாா். இந்த நிலையில் கடந்த ஓராண்டுக்கு முன்பு உடல்நலக் குறைவால் மாதேஷ் இறந்து விட்டாா்.
இதையடுத்து தீபா கடந்த டிசம்பா் மாதம் முதல் தனியாா் நிறுவனத்தின் உணவகத்தில் பணியாற்றி வந்தாா். வியாழக்கிழமை இரவு 9 மணிக்கு வேலையை முடித்து விட்டு தனது இரு சக்கர வாகனத்தில் வீட்டிற்கு வரும் வழியில் மா்ம நபா்களால் கத்தியால் குத்திக் கொலை செய்யப்பட்டாா்.
இந்தச் சம்பவம் குறித்து தகவல் அறிந்து வந்த மாவட்ட கூடுதல் காவல் கண்காணிப்பாளா் சங்கா், ஊத்தங்கரை காவல் துணை கண்காணிப்பாளா் சீனிவாசன் ஆகியோா் தலைமையிலான போலீஸாா் நிகழ்விடத்துக்கு விரைந்து சென்று விசாரணை மேற்கொண்டனா். மேலும் இரண்டு தனிப்படைகளை அமைத்து கொலையாளிகளைத் தேடி வருகின்றனா்.
தீபாவின் நண்பா் கௌதம் என்பவா் அளித்த தகவலின்பேரில் போலீஸாா் வழக்குப் பதிவு செய்து, தருமபுரி மாவட்டம், கம்பைநல்லூா், சமத்துவபுரத்தைச் சோ்ந்த மிதுன் (33) என்பவா் தான் கொலை செய்திருக்கலாம் என்ற கோணத்தில் அவரிடம் தீவிரமாக விசாரித்து வருகின்றனா். முதல்கட்ட விசாரணையில் தீபாவுக்கும், மிதுனுக்கும் தவறான
உறவு இருந்தது தெரிய வந்துள்ளது. மிதுனை விட்டு விட்டு கெளதமுடன் தீபா உறவை ஏற்படுத்திக் கொண்டதால் அவா் கொலை செய்யப்பட்டிருக்கலாம் என்று கூறப்படுகிறது.
படவரி...
ஊத்தங்கரை அருகே கத்தியால் குத்திக் கொலை செய்யப்பட்ட தீபா.
