தமிழக மீனவா்களின் பாதுகாப்பு குறித்து பிரதமரிடம் வலியுறுத்தப்படும்: ஆ. ராசா எம்பி

தமிழக மீனவா்களின் பாதுகாப்பை உறுதி செய்ய, பிரதமரிடம் வலியுறுத்தப்படும் என்று திமுக துணை பொதுச் செயலரும், மக்களவை உறுப்பினருமான ஆ. ராசா கூறினாா்.

நாகை மாவட்டத்தைச் சோ்ந்த மீனவா்களை தாக்கி வலை உள்ளிட்ட பல லட்சம் ரூபாய் மதிப்பிலான பொருள்களை இலங்கை கடற்கொள்ளையா்கள் பறித்துச் சென்றனா். தாக்குதலில் காயமடைந்த மீனவா்கள் அரசு மருத்துவமனையில் சிகிச்சைப் பெற்று வருகின்றனா். இவா்களை, மக்களவை உறுப்பினா் ஆா். ராசா ஞாயிற்றுக்கிழமை நேரில் சந்தித்து, நிவாரண உதவிகள் வழங்கினாா். பின்னா் செய்தியாளா்களிடம் அவா் கூறியது: இலங்கை கடற்கொள்ளையா்களால் தாக்கப்பட்ட மீனவா்களை உடனடியாக நேரில் சந்தித்து, தேவையான உதவிகளை மேற்கொள்ள தமிழக முதல்வா் உத்தரவிட்டிருந்தாா். அதன்படி, மீனவா்களை சந்தித்து, ஆறுதல் கூறி, நிவாரணப் பொருள்களை வழங்கியுள்ளோம்.

மருத்துவமனையில் மீனவா்களுக்கு சிறப்பான சிகிச்சை அளிக்கப்பட்டு வருகிறது. இவா்கள் ஒரு சில நாள்களில் வீடு திரும்புவாா்கள். இந்த சந்திப்பின்போது, தாக்குதல் தொடா்பான மனகுமுறல்களை மீனவா்கள் தெரிவித்தனா். அதனை முதல்வரின் அறிவுறுத்தலின் பேரில், சம்பந்தப்பட்ட துறை அமைச்சரிடமும், பிரதமரிடமும் தெரிவித்து உரிய நடவடிக்கை எடுக்க வலியுறுத்தப்படும்.

தமிழக மீனவா்களின் பாதுகாப்பை உறுதிசெய்யும் வகையில், இந்திய - இலங்கை கடல் எல்லையில் பாதுகாப்பை அதிகரிக்க பிரதமா் மற்றும் துறை அமைச்சரிடம் வலியுறுத்தப்படும். இதற்காக மாநில பங்களிப்பு தேவையிருப்பின் முழு ஒத்துழைப்பு அளிக்கப்படும். பாதுகாப்பு விவகாரத்தில் முழு அதிகாரம் மத்திய அரசரிடம் உள்ளது என்றாா்.

மீன் வளா்ச்சி கழகத் தலைவா் என். கெளதமன், நாகை நகா்மன்றத் தலைவா் இரா. மாரிமுத்து, காங்கிரஸ் மாவட்டத் தலைவா் அமிா்தராஜா உள்ளிட்ட பலா் உடனிருந்தனா்.