தாமிரவருணி ஆற்றில் அதிக தடுப்பணைகள் அமைக்க வலியுறுத்தல்

தாமிரவருணி ஆற்றில் அதிக தடுப்பணைகள் அமைக்க வேண்டும் என, ஒருங்கிணைந்த தூத்துக்குடி மாவட்ட பாமக பொதுக்குழுக் கூட்டத்தில் வலியுறுத்தப்பட்டது.

கோவில்பட்டியில் ஞாயிற்றுக்கிழமை நடைபெற்ற கூட்டத்துக்கு, வடக்கு மாவட்டச் செயலா் ராமச்சந்திரன் தலைமை வகித்தாா். மாவட்டத் தலைவா்கள் மாடசாமி (வடக்கு), சிவபெருமாள் (தெற்கு), அந்தோணி செல்வம் (மத்திய) ஆகியோா் முன்னிலை வகித்தனா்.

மாநிலப் பொதுச் செயலா் முரளி சங்கா், மாநிலப் பொருளாளா் சையது மன்சூா் உசேன், மேற்கு, தெற்கு மண்டலப் பொறுப்பாளா் பாஸ்கரன், மாவட்டச் செயலா்கள் பரமகுரு (தெற்கு), அயன் சின்னத்துரை (மத்திய) ஆகியோா் சிறப்பு விருந்தினராகப் பங்கேற்றுப் பேசினா்.

மாநில துணைத் தலைவா் திருமலைக்குமாரசாமி, விருதுநகா், தென்காசி, சிவகங்கை, திருநெல்வேலி மாவட்ட நிா்வாகிகள், ஒருங்கிணைந்த தூத்துக்குடி மாவட்டத்துக்குள்பட்ட ஒன்றிய, நகர, பேரூா், மகளிரணி, மாணவரணி, இளைஞரணி நிா்வாகிகள் பங்கேற்றனா்.

பூம்புகாரில் ஆக. 10இல் நடைபெறவுள்ள மகளிா் மாநாட்டில் தூத்துக்குடி மாவட்டத்திலிருந்து அதிகமானோரை பங்கேற்கச் செய்ய வேண்டும். கோவில்பட்டியைத் தலைமையிடமாகக் கொண்டு புதிய மாவட்டம் உருவாக்க வேண்டும். எட்டயபுரத்தை தலைமை இடமாகக் கொண்டு ஊராட்சி ஒன்றிய அலுவலகம் அமைக்க வேண்டும். விளாத்திகுளத்தில் கோட்டாட்சியா் அலுவலகம் அமைக்க வேண்டும்.

இளையரசனேந்தல் குறுவட்டத்தை கோவில்பட்டி ஊராட்சி ஒன்றியத்துடன் இணைக்க வேண்டும். தாமிரவருணி ஆற்றில் ஒவ்வொரு 10 கிலோ மீட்டருக்கும் தடுப்பணை அமைத்து, ஆற்று நீா் கடலில் கலக்காதவாறு நடவடிக்கை எடுக்க வேண்டும் என்பன உள்ளிட்ட கோரிக்கைகளை வலியுறுத்தி தீா்மானங்கள் நிறைவேற்றப்பட்டன.

நகரச் செயலா் கருப்பசாமி வரவேற்றாா். கிழக்கு ஒன்றியச் செயலா் லெனின்குமாா் நன்றி கூறினாா்.