ரூ.2,250 கோடியில் விரைவில் ஏற்றுமதி ஊக்குவிப்பு திட்டம்: அதிகாரிகள் தகவல்
திருப்பூர்: ரூ.50 லட்சம் கேட்டு வரதட்சணை கொடுமை; தற்கொலை செய்துகொண்ட இளம்பெண்; கணவர் குடும்பம் கைது
Admin
- 2 days ago
திருப்பூர் தாராபுரம் சாலை பிரண்ட்ஸ் கார்டன் பகுதியைச் சேர்ந்தவர் குப்புசாமி. பிளீச்சிங் ஆலை நடத்தி வந்த குப்புசாமி சில ஆண்டுகளுக்கு முன்பு இறந்துவிட்டார். இவரது மனைவி சுகந்தி. இந்தத் தம்பதியின் ஒரே மகள் பிரீத்தி (26). ஐ.டி. ஊழியராகப் பணியாற்றி வந்த பிரீத்திக்கும், ஈரோடு மாவட்டம் வீரப்பன்சத்திரத்தைச் சேர்ந்த சதீஷ்வர் (29) என்பவருக்கும் கடந்த ஆண்டு செப்டம்பர் 15-ஆம் தேதி திருமணம் நடைபெற்றுள்ளது.
இந்தத் திருமணத்தின்போது, தாய் சுகந்தி தனது மகள் பிரீத்திக்கு 120 பவுன் நகை, ரூ. 25 லட்சம் ரொக்கம், பல லட்சம் மதிப்பிலான சொகுசு கார் ஆகியவற்றைத் தந்துள்ளார்.
திருமணத்திற்குப் பிறகு கணவர் சதீஸ்வர், மாமனார் விஜயகுமார், மாமியார் உமா ஆகியோர் பிரீத்தியைத் துன்புறுத்தியதாகக் கூறப்படுகிறது. இதனால், கடந்த மாதம் 11-ஆம் தேதி தனது தாய் வீட்டுக்கு பிரீத்தி வந்துள்ளார். இந்நிலையில், பிரீத்தியின் குடும்பச் சொத்து அண்மையில் விற்பனை செய்யப்பட்டுள்ளது.
அதில், பிரீத்தியின் பங்காக ரூ.50 லட்சம் வந்துள்ளது. அந்தப் பணத்தைத் தன்னிடம் தருமாறு சதீஷ்வர் கேட்டு தொந்தரவு செய்துள்ளார். இதனால், மனமுடைந்த பிரீத்தி நேற்று முன்தினம் வீட்டில் யாரும் இல்லாத நேரத்தில் தூக்கிட்டுத் தற்கொலை செய்துகொண்டார். இதையடுத்து, நல்லூர் போலீஸார் பிரீத்தியின் உடலைக் கைப்பற்றி பிரேதப் பரிசோதனைக்காக திருப்பூர் அரசு மருத்துவக் கல்லூரி மருத்துவமனைக்கு அனுப்பி வைத்தனர்.
வரதட்சணை கொடுமை காரணமாக தனது மகள் பிரீத்தி தற்கொலை செய்து கொண்டார். இதற்குக் காரணமாக சதீஷ்வர், விஜயகுமார், உமா ஆகிய மூவரைக் கைது செய்யும் வரை உடலை வாங்கப் போவதில்லை என பிரீத்தியின் தாய் சுகந்தி தெரிவித்தார்.
திருமணம் ஆகி 7 ஆண்டுகளுக்குள் இருப்பதால் பிரீத்தியின் தற்கொலை தொடர்பாக திருப்பூர் வருவாய்க் கோட்டாட்சியர் விசாரணை நடத்தினார். அதில், வரதட்சணை காரணமாக பிரீத்தி தற்கொலை செய்து கொண்டது தெரியவந்தது.
இதைத் தொடர்ந்து, பிரீத்தியின் தாய் சுகந்தி அளித்த புகாரின் அடிப்படையில், பிரீத்தியின் கணவர் சதீஸ்வர், மாமனார் விஜயகுமார், மாமியார் உமா ஆகியோர் கைது செய்யப்பட்டுள்ளனர்.
கடந்த சில நாள்களுக்கு முன்பு வரதட்சணை காரணமாக இளம் பெண் ரிதன்யா தற்கொலை செய்துகொண்ட நிலையில், வரதட்சணை காரணமாக மீண்டும் ஒரு இளம்பெண் தற்கொலை செய்துகொண்டது திருப்பூரில் அதிர்ச்சியை ஏற்படுத்தி உள்ளது.
