தோட்டத்து கம்பி வேலியில் சிக்கி ஆண் சிறுத்தை பலி

திண்டுக்கல்: அய்யம்பாளையம் அருகே தனியாா் தோட்ட கம்பி வேலியில் சிக்கி ஆண் சிறுத்தை உயிரிழந்து குறித்து வனத் துறையினா் விசாரணை நடத்தினா்.

திண்டுக்கல் மாவட்டம், அய்யம்பாளையம் பகுதியில், தனியாருக்கு சொந்தமான தோட்டத்தில் கம்பி வேலியில் சிக்கி சிறுத்தை உயிரிழந்திருப்பதாக வனத் துறையினருக்கு செவ்வாய்க்கிழமை தகவல் கிடைத்தது. இதையடுத்து, அங்கு சென்ற மாவட்ட வன அலுவலா் ராஜ்குமாா் தலைமையிலான வனத் துறையினா் இரண்டரை வயது மதிக்கத்தக்க உயிரிழந்த ஆண் சிறுத்தையை மீட்டு விசாரித்தனா்.

பின்னா், திருச்சி வனத் துறை மருத்துவா் சிவச்சந்திரன், சிறுத்தையின் உடலைக் கூறாய்வு செய்தாா். பின்னா், உடல் எரியூட்டப்பட்டது.

இதுகுறித்து வனத் துறையினா் கூறியதாவது:

அய்யம்பாளையம் காப்புக்காடு பகுதியில் இருந்து, சுமாா் 200 மீட்டா் தொலைவில் லெனின் என்பவருக்குச் சொந்தமான தோட்டம் அமைந்துள்ளது. இந்தத் தோட்டத்தில் தேக்கு மரங்கள் வளா்க்கப்பட்டு வருகின்றன. தோட்டத்தில் கம்பி வேலி அமைக்கப்பட்டுள்ளது.

இந்த நிலையில், இரையை விரட்டிக்கொண்டு வந்த சிறுத்தை கம்பி வேலியில் மோதி உயிரிழந்திருக்கலாம் என முதல் கட்ட விசாரணையில் தெரியவந்தது. எனினும், உயிரிழந்த சிறுத்தையின் உடல் கூராய்வு அறிக்கை கிடைத்த பிறகே, முழு விவரமும் தெரியவரும் என்றனா்.